50 myń teńgege «Qazaqstannyń eńbek sińirgen qyzmetkeri» medalin, al 100 myń teńgege «Qazaqstannyń qurmetti azamaty» ataǵyn ala alasyz dep málimdedi búgingi ótken Májilis otyrysynda «AMANAT» partiiasy fraktsiiasynyń múshesi, depýtat Amanjol Áltai. Bul týraly "Ult aqparat" habarlaidy.
Depýtat memlekettik rámizderdiń elementterin, memlekettik nagradalardyń jáne ataqtardyń ataýyn qaitalaityn áreketterge quqyqtyq tosqaýyl qoiý kerek dep otyr.
"Memlekettik rámizder – táýelsiz elimizdiń beinesin tanytatyn simvoldyq mán-maǵynaǵa ie qasterli uǵymdar. Eldigimizdiń negigizgi nyshany — memlekettik rámizderdi tereń taný men qadirleý – búgingi bizder úshin de, keleshek urpaq úshin de amanaty úlken paryz. Biraq, rámizderimiz ben memlekettik nagradalardyń ataýyn, keskinin, keibir elementterin qaitalaityn túsiniksiz uiymdardyń mán-maǵynasy joq orden-medaldary, jalǵan ataqtary, jaýynnan keiingi sańyraýqulaqtai qaptap ketkeni shyndyq", - deidi Amanjol Áltai.
Depýtat dabyl qaqpasqa amal joq dep otyr, sebebi arzan ataqqa aldanǵandar men jeńil jolmen paida tapqysh, ataq satqyshtar kóbeiip barady.
"Mysaly, siz 50 myń teńgege pysyqai uiymnyń atynan «Qazaqstannyń eńbek sińirgen qyzmetkeri» medaline, al 100 myń teńgege «Qazaqstannyń qurmetti azamaty» ataǵyna ie bolasyz. San ǵasyrlyq eldik tarihymyzda «Ult ustazy» dep halyq usynǵan sáýleli sózdi qasterlep Ahmet Baitursynulyna ǵana qoldanatyn edik, qazir «Ult ustazy» degen ataqty bar bolǵany 10 myń teńgege satyp ala salasyz. Akademik degende kóz aldymyzǵa Qanysh Sátbaev sekildi ǵulama ǵalymdar elesteýshi edi, qazir 200 myń tege berip qaptaǵan túsiniksiz akademiialardyń jalǵan akademikgi bola salasyz", - deidi Amanjol Áltai.
Amanjol Áltai jurtty alaókpe qylatyn, óte qaýipti ári qoǵamdy búldiretin úrdiske tosqaýyl qoiýǵa shaqyrdy. Memlekettik rámizderimizdi retsiz qoldanyp, jalǵan ataqtar men qunsyz sólkebailardy satyp paida tapqysh pysyqailardyń áreketterine quqyqtyq negizde tiym salýdy usyndy.
Ekinshiden, depýtat rámizder máselesinde áli de oilastyrýdy, ortaq sheshimge kelýdi qajet etetin túitkilder baryn aityp, eń aldymen ataýlardy retteýdi talap etti.
"Geraldika – gerbter men olardy qoldaný dástúrlerin ǵana zertteitin arnaiy tarihi pán. Iaǵni geraldikanyń nysany – tek qana gerbter. Al, rámiztaný - budan keń aýqymdaǵy zertteýlerdi qajet etetin sala. Sondyqtan bul jumystarmen ainalysatyn mekemeni «Geraldikalyq zertteý ortalyǵy» dep emes, «Ulttyq rámiztaný ortalyǵy» dep atalǵany jón", - deidi ol.
Depýtattyń aitýynsha, rámiztaný nysanynda memlekettik rámizdermen qatar, ertedegi simvoldyq tańbalardan bastap, oiý-órnekter tiline deiin qamtylady jáne olardyń rámizdik mán-maǵynalary ashylady. Rámizder máselesin óz eliniń tarihymen sabaqtastyra qarastyrý álemniń Japoniia, Frantsiia siiaqty damyǵan elderiniń tájiribesinde bar.
Osyǵan orai, Amanjol Áltai rámiztanýdy arnaiy ǵylym retinde qalyptastyratyn ýaqyty kelgenin aityp, kelesi usynystardy jetkizdi:
1. Memleket basshysy Qasym-Jomart Kemelulynyń Ulttyq quryltaida aitqan tapsyrmasynan nátije shyǵaryp, aimaqtar men qalalardyń tańbasyn álemdik standarttar negizinde biryńǵai úlgige ikemdep ázirleý jáne bekitý tártibin retke keltirgen jón.
2. Qazirgi Geraldikalyq zertteý ortalyǵynyń ataýyn «Ulttyq rámiztaný ortalyǵy» dep ózgertý máselesi qarastyrylsyn.
3. Rámizderdi ǵylymi turǵyda zerttep, júieleý isine rámiztanýshylarmen qatar, tarih, arheologiia, etnografiia salalarynyń mamandaryn da keńinen tartý qajet.
4. Memlekettik rámizder arqyly qoǵamda patriottyq sezimdi ornyqtyrý úshin balabaqshadan bastap, mektep, kolledj, JOO-da rámiztaný boiynsha arnaýly tárbielik is-sharalar josparly túrde júieli ótýge tiis.
5. Memlekettik rámizderdiń elementterin, memlekettik nagradalardyń jáne ataqtardyń ataýyn qaitalalaityn áreketterge quqyqtyq tosqaýyl qoiý kerek.
"Osy depýtattyq saýalǵa zańnamada belgilengen merzim ishinde jazbasha jaýap kútemiz", - dep túiindedi sózin Amanjol Áltai.
