Qazaqstan biligi úlken qalalarǵa baǵyttalǵan ýrbanizatsiiany basqara bilýi kerek. Bul týraly «Habar» arnasyna bergen suhbatynda QR Tuńǵysh Prezidenti Nursultan Nazarbaev málim etti, dep habarlaidy QazAqparat.
«Parijge qarańyz. Ol qalai damyǵan? Kishkene ǵana Parij boldy. Keiin qala shetin halyq toltyrdy da, bilik turǵyn úi kvartaldaryn sala bastady. Osylaisha, qala óse berdi. Niý-Iork te solai ósip keledi. Mehikodaǵy 20 mln adamnyń jartysy qala shetinde turady. Kez kelgen qalada solai. Iaǵni, adam ózine qolaily ortany tańdaidy. Úlken qalalarda ǵylym damidy, zaýyttar men kásiporyndar salynady, úzdik joǵary oqý oryndary sonda bolady. Mektepter de, meiramhanalar da úzdik. Bári sapaly. Sebebi úlken qalalarda ǵylym men bilim qordalanady. Tiisinshe, adamnyń mundai qalaǵa tartylýy zańdy. Bul ýrbanizatsiiany eshkim toqtata almaidy», - dedi Nursultan Nazarbaev.
Elbasynyń aitýyna qaraǵanda, bul ýrbanizatsiiany basqaryp úirený kerek.
«Máselen, astanada da, Almatyda da sondai máseleler bar. Sondyqtan, qalasaq ta, qalamasaq ta úlken million halqy bar qalalar báribir bolady. Taldaýshylar men sarapshylar bári bir aýyzdan «álemdi million halqy bar qalalar basqarady» degen pikirde. Boljam boiynsha, million halqy bar 600 qala bar delinedi. Ol shaharlarda ǵylym men bilim shyńdalady. Mádeniet damidy. Million halqy bar qalany ólmes qalalar dep ataidy. Nege? Sebebi, daǵdarys kezinde de onda jumys kúshi bar. Úlken qalalar ónim shyǵaryp satsa, satyp alýshylar da tabylady. Iaǵni, qala óz-ózin qamti alady», - dedi ol.
Nursultan Nazarbaev Almatynyń halqy 2 mln adamǵa taqap qalǵanyn, elordada 1,25 mln adam ekenin, Shymkenttiń 1 mln halqy baryn eske saldy.
«Jarty million halqy bar Qaraǵandy, Aqtóbe sekildi qalalar da jyl sanap ósip keledi», - dedi ol.
