قازاقستان بيلٸگٸ ٷلكەن قالالارعا باعىتتالعان ۋربانيزاتسييانى باسقارا بٸلۋٸ كەرەك. بۇل تۋرالى «حابار» ارناسىنا بەرگەن سۇحباتىندا قر تۇڭعىش پرەزيدەنتٸ نۇرسۇلتان نازارباەۆ مەلٸم ەتتٸ, دەپ حابارلايدى قازاقپارات.
«پاريجگە قاراڭىز. ول قالاي دامىعان? كٸشكەنە عانا پاريج بولدى. كەيٸن قالا شەتٸن حالىق تولتىردى دا, بيلٸك تۇرعىن ٷي كۆارتالدارىن سالا باستادى. وسىلايشا, قالا ٶسە بەردٸ. نيۋ-يورك تە سولاي ٶسٸپ كەلەدٸ. مەحيكوداعى 20 ملن ادامنىڭ جارتىسى قالا شەتٸندە تۇرادى. كەز كەلگەن قالادا سولاي. ياعني, ادام ٶزٸنە قولايلى ورتانى تاڭدايدى. ٷلكەن قالالاردا عىلىم داميدى, زاۋىتتار مەن كەسٸپورىندار سالىنادى, ٷزدٸك جوعارى وقۋ ورىندارى سوندا بولادى. مەكتەپتەر دە, مەيرامحانالار دا ٷزدٸك. بەرٸ ساپالى. سەبەبٸ ٷلكەن قالالاردا عىلىم مەن بٸلٸم قوردالانادى. تيٸسٸنشە, ادامنىڭ مۇنداي قالاعا تارتىلۋى زاڭدى. بۇل ۋربانيزاتسييانى ەشكٸم توقتاتا المايدى», - دەدٸ نۇرسۇلتان نازارباەۆ.
ەلباسىنىڭ ايتۋىنا قاراعاندا, بۇل ۋربانيزاتسييانى باسقارىپ ٷيرەنۋ كەرەك.
«مەسەلەن, استانادا دا, الماتىدا دا سونداي مەسەلەلەر بار. سوندىقتان, قالاساق تا, قالاماساق تا ٷلكەن ميلليون حالقى بار قالالار بەرٸبٸر بولادى. تالداۋشىلار مەن ساراپشىلار بەرٸ بٸر اۋىزدان «ەلەمدٸ ميلليون حالقى بار قالالار باسقارادى» دەگەن پٸكٸردە. بولجام بويىنشا, ميلليون حالقى بار 600 قالا بار دەلٸنەدٸ. ول شاھارلاردا عىلىم مەن بٸلٸم شىڭدالادى. مەدەنيەت داميدى. ميلليون حالقى بار قالانى ٶلمەس قالالار دەپ اتايدى. نەگە? سەبەبٸ, داعدارىس كەزٸندە دە وندا جۇمىس كٷشٸ بار. ٷلكەن قالالار ٶنٸم شىعارىپ ساتسا, ساتىپ الۋشىلار دا تابىلادى. ياعني, قالا ٶز-ٶزٸن قامتي الادى», - دەدٸ ول.
نۇرسۇلتان نازارباەۆ الماتىنىڭ حالقى 2 ملن ادامعا تاقاپ قالعانىن, ەلوردادا 1,25 ملن ادام ەكەنٸن, شىمكەنتتٸڭ 1 ملن حالقى بارىن ەسكە سالدى.
«جارتى ميلليون حالقى بار قاراعاندى, اقتٶبە سەكٸلدٸ قالالار دا جىل ساناپ ٶسٸپ كەلەدٸ», - دەدٸ ول.
