Shikizatqa táýeldi bolýdyń saldarynan qazaqstandyqtar eńbek básekesine shydai almaityn boldy. Bul týraly Memleket basshysy Qasym-Jomart Toqaev «QAZAQSTAN» telearnasyna bergen suhbatynda aitty, dep habarlaidy QazAqparat.
«Aldyńǵy suhbatyńyzda siz elimizde kadr tapshylyǵy bar ekenin aittyńyz. Shyn máninde, kóptegen bilikti mamandarymyz shetelde júr. Bilim qýyp, kásip izdep ketkender de bar. Sheteldegi otandastarymyzdy Qazaqstanǵa shaqyrý oiyńyzda bar ma? Jalpy bul iske asýy múmkin dúnie me?», - dep suraq qoidy jýrnalist Jaina Slambek.
«Rasynda shetelde júrgen bilikti mamandarymyz az emes. Bul úshin eshkimdi aiyptaýǵa bolmaidy. Qazir – jahandaný zamany. Adam qai jerde suranysqa ie bolsa, sol jerge baryp jumys isteýge qaqy bar. Oǵan eshkim kedergi jasamaidy. Biz óz salasynda tabysqa jetken azamattardy buǵan deiin de shaqyrǵanbyz. Elge qaityp kelgen otandastarymyz da bar. Biraq, shyndyǵyn aitýymyz kerek, elimizge bilimi joǵary, parasatty adamdar kerek. Jalpy, adami kapital joǵary bolýy qajet. Jalpaq tilmen aitsaq, Otanymyzǵa kelgen adamdardyń sapasy neǵurlym joǵary bolsa, elimizge soǵurlym tiimdi bolady», - dedi Qasym-Jomart Toqaev.
Prezident bári eńbekqorlyqtyń, biliktiliktiń ideologiiasyn kóterýi kerektigin atap ótti. Ultymyz dúnie júzinde, eń aldymen, eńbekqor, jumysqa adal ult retinde moiyndalatyn bolsa, bul ekonomikamyzǵa oń áser etedi.
«Masyldyqtan, jalqaýlyqtan alshaq bolýymyz qajet. Sonda ǵana Jańa Qazaqstan tujyrymdamasy iske asady. Menińshe, biz buryn úlken ideologiialyq qatelik jiberdik. Shetelge, iaǵni Orta Aziiadan Reseige ketken jumysshylarǵa kúlip, «Qarańyzdar, olar qara jumyspen ainalysýǵa májbúr boldy, al bizge kelgende, birde-bir qazaq shetelde jumys istemeidi, jaibaraqat júrmiz» dep qatty maqtandyq. Kez kelgen eńbekti joǵary baǵalaý qajet, solai emes pe? Búgingi kúni Orta Aziiadaǵy jumysshylar Reseide eńbek etip, kún kórip jatyr. Al, bizdikiler eńbek básekesine shydai almaityn boldy. Ókinishke qarai, bul - «syrevoe prokliate», iaǵni «shikizatqa táýeldi bolýdyń» saldary», - dedi Memleket basshysy.
