Almatyda Úlken Almaty ózeniniń qyzyl túske boialýyn quzyrly organdar túsindire almai otyr, dep habarlaidy QazAqparat.
«Qazgidromet» RMK qyzyl túske boialǵan Úlken Almaty ózeni sýyn zertteý qorytyndysyn jariialady. Zerthana mamandary qalalyq Ekologiia departamentiniń ókilderimen birlese otyryp ózen sýynan synama alǵan bolatyn.
Sý ózenniń bastalǵan tusy - Almaarasan ańǵarynan, orta tusy - Q.Sátbaev kóshesiniń boiynan, tómengi tusy - T.Rysqulov dańǵyly mańynan alynǵan bolatyn. Jelide taralǵan video ózenniń orta tusynda - Sátbaev kóshesiniń mańynda túsirilgen bolatyn.
«Sýdyń iisi joq bolatyn. Analiz barysynda túsi ózgergen joq. Negizgi kórsetkishter sýdyń temperatýrasy, ottektik quramy, túsi, móldirligi qalypty», - dedi «Qazgidromet» RMK Almaty bólimshesiniń himiialyq taldaý bóliminiń basshysy Aijan Núkenova.
Onyń aitýynsha, Almaarasan ańǵarynda eshqandai ziiandy zattardyń kórsetkishten joǵarylaýy ańǵarylmaǵan. Al, Sátbaev kóshesiniń tusynda temirdiń kórsetkishi ruqsat etilgen shekti kórsetkishten 1,4 joǵary bolǵany belgili boldy. «Al Rysqulov kóshesi mańynda alynǵan sýdan nitritti azot ruqsat etilgen shekti kórsetkishten 1,5, temir - 2,8, mys - 1,2, marganets - 1,6 kórsetkishke artyq ekeni anyqtaldy.
Sýdan ammonii tuzy, fosfat, karbonat, munai qaldyqtary tabylǵan joq. Biraq, bul ádettegi Almaty ózeniniń taldaýyna uqsaidy. Joǵaryda aitylǵandar sýdy qyzyl túske boiady dep naqty aita almaimyn», - dedi Aijan Núkenova.
Qalalyq Ekologiia departamenti de sýdyń ashyq qyzy túske boialýyna ne áser etkenin naqty aita almai otyr. Qalalyq Qoǵam densaýlyǵyn qorǵaý departamentiniń basshysy Aizat Moldaqasymova da sý synamasynda ziiandy toksindi zattar tabylmaǵanyn aitty.
Aita ketý kerek,Úlken Almaty ózeniniń qyzyl túske boialǵany turǵyndardy tań qaldyrdy. Atalǵan video áleýmettik jeli arqyly tarap ketken bolatyn.
