Foto: Indýstriia jáne infraqurylymdyq damý ministrliginiń baspasóz qyzmeti
Qazaqstandaǵy iri jol-kólik infraqurylymdarynyń biri - Úlken Almaty ainalma avtojoly halyq igiligine berildi. Onyń resmi ashylýyna QR IIDM Avtomobil joldary komitetiniń tóraǵasy Tólegen Abdýllin, Almaty oblysynyń ákimi Marat Sultanǵaziev jáne Almaty qalasynyń ákimi Erbolat Dosaev qatysty, dep habarlaidy Indýstriia jáne infraqurylymdyq damý ministrliginiń baspasóz qyzmeti.
Kólik júrgizýshileri jańa joldyń ústimen júrip, onyń artyqshylyqtaryn baǵamdap kórdi. Atalǵan ainalma avtojoly el tarihyndaǵy alǵashqy kontsessiialyq joba sanalady. Onyń qurylysy 3 jyl buryn túrik-koreialyq konsortsiýmynyń negizinde qolǵa alynyp, josparǵa sáikes 2024 jyly qoldanysqa berilýi kerek edi. Dese de qarqyndy jumystardyń nátijesinde bul nysan merziminen buryn tapsyrylyp otyr.
QR IIDM Avtomobil joldary komitetiniń tóraǵasy Tólegen Abdýllin avtojoldyń tiimdiligi men basymdyqtaryn atap ótti. Onyń aitýynsha, Úlken Almaty ainalma avtojoly megapolis kóshelerindegi jáne qala mańyndaǵy keptelisti azaityp, ekologiialyq jaǵdaidy jaqsartady.
«Bul - elimizdiń tarihyndaǵy mańyzdy sátterdiń biri. Sebebi Úlken Almaty ainalma avtojoly Ortalyq Aziiadaǵy eń iri infraqurylymdyq joba sanalady. Osy jol qurylysy halyqtyń igiligi úshin qolǵa alynǵanyn atap ótken jón. Sondai-aq atalǵan joba megapolis turǵyndary men jergilikti halyqtyń erkin qozǵalýyna septigin tigizeri anyq», dedi Tólegen Abdýllin.
Kontsessiia tetigine sáikes qurylys jumystaryn investor jeke qarajatyn esebinen júrgizgen. Endi taiaý 16 jyl boiy jol investordyń kepildik merziminde bolady. 66 shaqyrymǵa jalǵasqan ainalma joldy jarty saǵatta eńserýge bolady.
Kólik júrgizýshileri jańa joldyń tiimdiligin baiqap, rizashylyqtaryn jetkizdi.
«Bul ainalma jol - Almaty qalasy men Almaty oblysyna shynymen de qajetti jobalardyń biri. Óz basym júk tasymalymen ainalysamyn jáne Almatynyń keptelisterin jaqsy bilemin. Úlken Almaty ainalma joly ashylsa, júk tasymaldaýshylar men qarapaiym turǵyndardyń júrip-turýy jeńildep, keptelis máselesi sheshiledi degen oidamyz», dedi kólik júrgizýshisi Mihail Dranitsa.
Almaty oblysynyń ákimi Marat Sultanǵazievtiń aitýynsha, jańa jol-kólik infraqurylymy óńirdiń áleýmettik-ekonomikalyq kórsetkishterin jaqsartyp, halyqtyń ál-aýqatyn arttyrýǵa yqpal etpek.
«Atalǵan ainalma avtojoly memleket-jekemenshik áriptestik aiasynda salynǵan elimizdegi mańyzdy investitsiialyq jobalardyń biri. Ol tutastai óńirdiń ekonomikalyq damýyna serpin beretin Batys Qytai – Batys Eýropa tranzittik dáliziniń negizgi tarmaǵy sanalady. Osy jol oblysymyzdyń damýyna áser berip, investitsiialyq jáne týristik áleýetti arttyrady degen senimdemiz», dedi Sultanǵaziev.
Almaty qalasynyń ákimi Erbolat Dosaev BAKADtyń ÚAAAJ Almaty aglomeratsiiasynyń kólik qurylymynyń negizi bolyp tabylatynyn aitty.
«Almaty qalasynyń 2040 jylǵa deiingi jańa bas jospary aiasynda búginde ÚAAAJ-na qatysty alty radialdy joldyń qurylysy júrgizilip jatyr», - dedi Dosaev.
ÚAAAJ-dyń ashylýy Almaty qalasynyń aýmaǵyna tranzittik kólikterdiń kirýine jol bermeý arqyly Almaty qalasyndaǵy kólik keptelisin orta eseppen 20%-ǵa azaitady. Bul qalanyń ekologiialyq jaǵdaiyn jaqsartady. aglomeratsiia almatylyqtar úshin kólik qyzmetiniń sapasyna oń áser etpek.
Ainalma jol 1-a tehnikalyq sanaty boiynsha salynǵan. Atalǵan jobany qarjylandyrýǵa Eýraziialyq damý banki de qatysqanyn atap ótken abzal.
«Úlken Almaty ainalma avtojoly Qazaqstan men Eýraziia aimaǵynda kólik marshrýttaryn keńeitý boiynsha mańyzdy ról atqarady. Jańa nysan «Shyǵys-Batys» baǵytyndaǵy halyqaralyq avtokólik marshrýttaryn bailanystyryp, kólik qatynasyn jaqsartýǵa, júk tasymalynyń múmkindikterin keńeitýge oń yqpal etedi. Osy jol arqyly tasymaldanatyn júktiń boljamdy kólemi taiaý 10-15 jylda 87%-ǵa ulǵaiyp, 35,9 mln tonnaǵa jetýge tiis», dedi Eýraziialyq damý bankiniń basqarma tóraǵasy Nikolai Podgýzov.
Resmi bólimnen keiin jańa joldyń boiymen birneshe kólik júrip ótti. Atap aitqanda, ÚAAAJ belgileri bar 10 aýyr júk kóligi, 10 avtobýs jáne jeńil avtokólikter Qaskeleń qalasyna deiin jol tartty.
