Foto: uiymdastyrýshylardan
Jambyl oblysy Baizaq aýdanynda jańa balalar oiyn alańy ashyldy, dep habarlaidy Ult.kz.
Jambyl oblysy Baizaq aýdany Úlgili aýylynda balalarǵa arnalǵan jańa oiyn alańy ashyldy. Nysan «Asqaq rýh – Erkin el» qoǵamdyq birlestiginiń bastamasymen jáne oblys ákiminiń qoldaýymen júzege asqan «Úlgili aýylǵa – úlgili alań!» áleýmettik jobasynyń nátijesi.
Úlgili aýylynda 3 myńnan astam turǵyn bar. Bul – balalardyń bos ýaqytyn qaýipsiz ári tiimdi ótkizýge arnalǵan alǵashqy arnaiy keńistik. Joba «Jambyl oblysy Baizaq aýdany Úlgili aýyly turǵyndarynyń azamattyq bastamalaryn qoldaý» baǵyty boiynsha iske asyrylǵan.
Alańnyń ashylý rásimine aýdan ákimi, oblystyq Azamattyq Alians tóraǵasy, ziialy qaýym ókilderi, ardagerler, analar keńesi, máslihat depýtattary jáne aýyl turǵyndary qatysty.
Aýdan ákimi Oljas Baqqaraev ortaq iske aýyl turǵyndarynyń belsendi qatysqanyn atap ótti:
«Qazaqta ‘Qýansa — bala qýansyn’ degen sóz bar. Búgingi balalar — erteńgi eldiń azamaty. Bul alań — jas býynǵa jasalǵan mańyzdy qoldaý», — dedi ol.
Oblys ákiminiń keńesshisi Islambek Dastan jobanyń turǵyndar yntymaǵynyń arqasynda júzege asqanyn aitty. Onyń sózinshe, jabdyqtar 4,5 mln teńgege satyp alynyp, ornatý jumystary aýyl belsendilerine senip tapsyrylǵan.
Jańa alań zamanaýi talaptarǵa sai jabdyqtalǵan: syrǵanaqtar, átkenshekter, oiyn keshenderi, karýselder, qumsalǵysh jáne qaýipsiz jabyn ornatylǵan. Aýmaǵy tolyq qorshalyp, demalys oryndary jasaqtalǵan.
Alańǵa alǵashqy qadamdy aýyl analar keńesi shashý-shashýmen bastady. Aqjaýlyqty analardyń bul rásimi sharaǵa erekshe ulttyq óń berdi.
Turǵyndar men aqsaqaldar jobaǵa qoldaý kórsetkenderge alǵys aityp, nysandy uqypty paidalaný qajet ekenin atap ótti.
Alań resmi túrde aýyl ákimdiginiń balansyna berildi. Endi onyń kútimi men qaýipsizdigi jergilikti atqarýshy organnyń baqylaýynda bolady.
Bul joba — Memleket basshysy atap júrgen balalardyń ál-aýqatyn jaqsartýǵa baǵyttalǵan saiasattyń aýyl deńgeiindegi naqty kórinisi.
