Kókshetaý irgesindegi Krasnyi iar kentinde eki qabatty úi órtenip, bir otbasy qaza tapty. Shyrt uiqyda jatqan erli-zaiyptylar egiz balasymen qyzyl jalyn qursaýynan shyǵa almai qalǵan, - dep habarlaidy Tengrinews.kz agenttigi KTK telearnasyna silteme jasap.
"Uiyqtap jatqanbyz, esikti kórshi áiel qatty urǵylady. "Kómektesińder" dep aiǵailady, atyp shyqtyq, páterdiń ishi janyp jatyr eken. Kórshiler ý-shý bolyp terezeni syndyrdyq. Bári tez boldy. Úlgermedik", - deidi marqumdardyń kórshisi Irina Shermer.
Telearnasy málimetinshe, órt tún ortasynda tutanǵan. Tilsiz jaý ábden kúsh alǵan kezde ájeleri oianyp, ózgelerin oiatpaqshy bolypty. Tipti jeti jasar nemeresin alyp syrtqa umtylǵan. Biraq esikten shyǵa almai, terezeden tysqa qashyp shyǵypty. Al tór bólmede jatqan 30 jastaǵy balasy men kelini jáne tórt jastaǵy egiz balalary úlgermegen. Kórshileri kómekke umtylǵanmen, úidiń ishindegi órttiń beti qatty bolǵan. Kenttiń ózinde ornalasqan órt sóndirýshiler de habar túsisimen jetken. Biraq olar marqumdardyń kúigen denesin alyp shyǵypty. Tórteýi kereýetten turyp qana úlgeripti. Alǵashqy boljam: elektr jelileri tuiyqtalǵan. Marqumnyń týystary osy úide bir kún buryn elektr qurylǵylarynan aqaý shyǵyp, mamandar jóndeý júrgizgen deidi.
"Qazir órt-tehnikalyq saraptama istep jatyr. Negizi, órt ishte bolǵan. Tún ortasynda bolǵan oqiǵany eshkim baiqamai, úi ieleri de qatty uiqyda bolǵan. Onyń ústine, qazirgi tóbe jabyndylary, plastikalyq taqtaishalar janǵanda ýly zat bólinedi. Marqumdar birden tunshyǵyp ketýi múmkin. Endi ony sot meditsinalyq saraptama anyqtaidy", - dedi Aqmola oblysy TJD bastyǵynyń orynbasary Manarbek Shapaǵatov.
