Qazaqstanda úlestik qurylystaǵy alaiaqtyq boiynsha 27 qylmystyq is tergelip jatyr, dep habarlaidy QazAqparat.
«Atalǵan qylmystyq ister boiynsha zardap shekken 305 adamdy anyqtadyq. Olar 3 milliard 200 million teńgeden astam somaǵa materialdyq shyǵynǵa ushyraǵan», - dedi QR IIM Tergeý departamentiniń basshysy Sanjar Ádilov ministrlik uiymdastyrǵan onlain brifingte.
Vedomstvo málimetinshe, Nur-Sultan qalalyq Politsiia departamentiniń tergeý basqarmasy «Shyǵys» turǵyn úi keshenin salýshyǵa qatysty qylmystyq isti tergep jatyr. Atalǵan qylmystyq is boiynsha 24 jábirlenýshi anyqtalǵan. Alyn ala boljam boiynsha shyǵyn kólemi 184 million 900 myń teńgeni quraǵan.
«Sonymen birge, Nur-Sultan qalasynda Expo New Life turǵyn úi kesheni úleskerleriniń ótinishimen «Shang Hi Grýp» JShS-na qatysty qylmystyq is tergelip jatyr. Bul qylmystyq is boiynsha biz eki epizodty tirkedik, kelgen zalal somasy 2 milliard teńgeden asty. Mańǵystaý oblysynda «Mahabbat» turǵyn úi kesheniniń qurylysy jóninde qylmystyq is tergelýde. Munda 21 úlesker jábirlenýshi bolyp tanyldy, 252 million teńgeden astam zalal kelgen», - dedi S. Ádilov.
Úlestik qurylys boiynsha barlyq qylmystyq ister Ishki ister ministrliginiń baqylaýynda. Ol úshin arnaiy jedel-tergeý toptary qurylǵan.
