قازاقستاندا ٷلەستٸك قۇرىلىستاعى الاياقتىق بويىنشا 27 قىلمىستىق ٸس تەرگەلٸپ جاتىر, دەپ حابارلايدى قازاقپارات.
«اتالعان قىلمىستىق ٸستەر بويىنشا زارداپ شەككەن 305 ادامدى انىقتادىق. ولار 3 ميلليارد 200 ميلليون تەڭگەدەن استام سوماعا ماتەريالدىق شىعىنعا ۇشىراعان», - دەدٸ قر ٸٸم تەرگەۋ دەپارتامەنتٸنٸڭ باسشىسى سانجار ەدٸلوۆ مينيسترلٸك ۇيىمداستىرعان ونلاين بريفينگتە.
ۆەدومستۆو مەلٸمەتٸنشە, نۇر-سۇلتان قالالىق پوليتسييا دەپارتامەنتٸنٸڭ تەرگەۋ باسقارماسى «شىعىس» تۇرعىن ٷي كەشەنٸن سالۋشىعا قاتىستى قىلمىستىق ٸستٸ تەرگەپ جاتىر. اتالعان قىلمىستىق ٸس بويىنشا 24 جەبٸرلەنۋشٸ انىقتالعان. الىن الا بولجام بويىنشا شىعىن كٶلەمٸ 184 ميلليون 900 مىڭ تەڭگەنٸ قۇراعان.
«سونىمەن بٸرگە, نۇر-سۇلتان قالاسىندا Expo New Life تۇرعىن ٷي كەشەنٸ ٷلەسكەرلەرٸنٸڭ ٶتٸنٸشٸمەن «شانگ حي گرۋپ» جشس-نا قاتىستى قىلمىستىق ٸس تەرگەلٸپ جاتىر. بۇل قىلمىستىق ٸس بويىنشا بٸز ەكٸ ەپيزودتى تٸركەدٸك, كەلگەن زالال سوماسى 2 ميلليارد تەڭگەدەن استى. ماڭعىستاۋ وبلىسىندا «ماحاببات» تۇرعىن ٷي كەشەنٸنٸڭ قۇرىلىسى جٶنٸندە قىلمىستىق ٸس تەرگەلۋدە. مۇندا 21 ٷلەسكەر جەبٸرلەنۋشٸ بولىپ تانىلدى, 252 ميلليون تەڭگەدەن استام زالال كەلگەن», - دەدٸ س. ەدٸلوۆ.
ٷلەستٸك قۇرىلىس بويىنشا بارلىق قىلمىستىق ٸستەر ٸشكٸ ٸستەر مينيسترلٸگٸنٸڭ باقىلاۋىندا. ول ٷشٸن ارنايى جەدەل-تەرگەۋ توپتارى قۇرىلعان.
