Foto: Akorda.kz
Memleket basshysy UQShU Ujymdyq qaýipsizdik keńesiniń shaǵyn quramda ótken sessiiasyna qatysty, dep habarlaidy "Ult aqparat" Aqordanyń resmi saityna silteme jasap.
Jiynǵa Belarýs Respýblikasynyń Prezidenti Aleksandr Lýkashenko, Qyrǵyz Respýblikasynyń Prezidenti Sadyr Japarov, Resei Federatsiiasynyń Prezidenti Vladimir Pýtin, Tájikstan Respýblikasynyń Prezidenti Emomali Rahmon, sondai-aq UQShU Bas hatshysy Imanǵali Tasmaǵambetov qatysty.
Sessiia barysynda UQShU-ǵa múshe memleketterdiń ujymdyq qaýipsizdigin qamtamasyz etýdiń ózekti aspektileri talqylandy. Sonymen qatar uiym qyzmetiniń basty baǵyttary boiynsha biyl atqarylǵan jumystardyń qorytyndysy jasalyp, aldaǵy kezeńniń jospary aiqyndaldy. Budan bólek, memleketter basshylary jahandyq kún tártibindegi máseleler jóninde pikir almasty.
Qasym-Jomart Toqaev óz sózinde búgingi sessiia halyqaralyq ahýal kúrt nasharlaǵan óte qiyn jaǵdaida ótip jatqanyna nazar aýdardy. Eýraziia qurlyǵyndaǵy jáne UQShU jaýapkershiligine kiretin aimaq tóńireginde kúrdeli jaǵdai qalyptasyp otyr. Memleket basshysynyń pikirinshe, Taiaý Shyǵystaǵy oqiǵalardyń aýjaiy da erekshe alańdaýshylyq týǵyzady.
– Qaqtyǵystan beibit halyq zardap shegip otyr. Qanshama jazyqsyz adam, balalar qaza tapty. Mundaiǵa bei-jai qaraý múmkin emes. Qazaqstan Gaza turǵyndaryna bir million dollar kóleminde gýmanitarlyq kómek kórsetti. Qarjy BUU qurylymy – UNRWA/BAPOR uiymy arqyly jiberildi. Qaqtyǵys kezinde bul uiymnyń qyzmetkerleri óte kóp shyǵynǵa ushyraǵanyna qaramastan, jumysyn erlikpen jalǵastyryp jatyr. Taiaý Shyǵystaǵy qaqtyǵys, shyn máninde, jahandyq aýqymdaǵy aqparattyq-ideologiialyq teketiresti ábden shiryqtyryp jiberdi. Gaza sektory tóńireginde bolyp jatqan oqiǵalar álemdik qoǵamdastyqty ekige jardy. Soǵys órti barlyq el men kontinentti sharpymai turǵanda toqtaǵany jón, – dedi Prezident.
Memleket basshysy Qazaqstannyń ýaqytsha bitim jasaý týraly sońǵy kelisimdi quptaitynyn málimdedi.
– Biz áýel bastan qaqtyǵysýshy taraptardyń gýmanitarlyq úzilis jariialaýy kerek ekenin aittyq. Olar osy ýaqytty qalyptasqan jaǵdaidy retteýdiń uzaqmerzimdi sharalaryn ázirleýge paidalaný úshin bar kúsh-jigerin jumsaýy qajet. Buǵan qosa, BUU aiasynda palestinalyqtarǵa «Eki halyq úshin eki memleket» formýlasyna sai tolyqqandy memleket qurý quqyǵyn bergen jón. Osyndai qiyn jaǵdaida BUU Qaýipsizdik Keńesiniń qararyn múltiksiz oryndap, halyqaralyq quqyq normalaryn saqtaý mańyzdy, – dedi Qasym-Jomart Toqaev.
Sonymen qatar Qazaqstan Prezidenti Aýǵanstandaǵy kúrdeli ahýalǵa nazar aýdaryp, halyqaralyq qoǵamdastyqty aýǵan halqyna kómek berý isin jalǵastyrýǵa shaqyrdy.
– Aýǵan halqyna gýmanitarlyq kómek kórsetýdi jalǵastyrý jáne taýqymeti kóp osy eldiń óńirlik ekonomikaǵa integratsiialanýyna yqpal etý mańyzdy dep sanaimyz. Biyl Qazaqstan Aýǵanstanǵa azyq-túlik, asa qajetti taýarlar men dári-dármek jóneltti. Qazan aiynda Aýǵanstannyń batysynda bolǵan jer silkinisine bailanysty kómek kórsetildi. Gerat qalasyna qutqarýshylar, kinologtar men meditsina qyzmetkerleri jiberildi,– dedi Memleket basshysy.
Qasym-Jomart Toqaev UQShU aiasyndaǵy seriktesterdiń ádettegi qaýip-qater deńgeiiniń ulǵaiýyna, sonyń ishinde esirtki, qarý-jaraq ainalymynyń, transshekaralyq qylmys pen zańsyz migratsiianyń ósýine qatysty alańdaýshylyǵyna túsinistikpen qaraitynyn málimdedi. Qazaqstan Uiymǵa múshe memlekettermen birge osy syn-qaterlerge aldaǵy ýaqytta da tótep berýge ázir.
– Biz UQShU qyzmetiniń ádis-tásili men strategiiasyn jolǵa qoia otyryp, zamanaýi qaýip-qater men syn-tegeýrinderdi mindetti túrde eskerýge tiispiz. Sonymen qatar UQShU-ǵa múshe memleketterdiń qaýipsizdigine qater tónip kele jatqanyn, eger ondai qaýip bolsa da, ony únemi aita berýdiń qajeti joq dep oilaimyn. Túptep kelgende, qaýip-qater árdaiym bolǵan. Halyqaralyq qoǵamdastyqtyń bolmysy osyndai. Bul taqyrypty qaita-qaita kóterý, bizdi áldekimnen qorqatyndai kórinis qalyptastyrady. Mundai málimdemeler múlde qate túsinikke alyp kelýi múmkin, tipti qazirdiń ózinde solai bolyp kórinedi. Qatysýshy memleketterdiń abyroi-bedelin jáne olardyń áskeri-saiasi áleýeti men qýatyn eskere otyryp, Uiymnyń ritorikasy qatal, áitse de belgili bir deńgeide qisyndy bolýǵa tiis. UQShU bedeldi áskeri-saiasi uiym retinde óziniń jetistikterin pash etti. Biraq aldymyzda uiymǵa múshe memleketterdiń konstrýktivti múddesine sai kelýge tiis jańa mindetter tur, – dedi Qazaqstan Prezidenti.
Sonymen qatar Qasym-Jomart Toqaev Uiymnyń áleýetin damytý jáne syn-qater men qaýipke qarsy is-qimyl tetikteriniń tiimdiligin arttyrý úshin bir jyl ishinde aýqymdy jumys atqarylǵanyn atap ótti. Prezident 2024 jyldyń 1 qańtarynan bastap Qazaqstan Uiymǵa tóraǵalyq etetinin jáne osy kezeńde basymdyq beriletin baǵyttardy keńeitilgen quramdaǵy jiyn barysynda jetkizetinin aitty.
Qasym-Jomart Toqaev elimizdiń Uiymdy qarqyndy ári teńgerimdi damytýǵa, barlyq múshe memlekettiń ulttyq múddelerin eskere otyryp, ujymdyq qaýipsizdikti nyǵaitýǵa nietti ekenin málimdedi.
