Qazaqstandaǵy Májilis pen máslihattar depýtattaryn sailaý joǵary deńgeide uiymdastyrylǵan. Mundai pikirdi RF Memlekettik dýmasy TMD isteri, Eýraziialyq integratsiia jáne otandastarmen bailanys komiteti tóraǵasynyń orynbasary, UQShU Parlamenttik assambleiasynan baiqaýshylar missiiasynyń múshesi Ýmahan Ýmahanov bildirdi, dep habarlaidy QazAqparat.
«Keshe 49 sailaý ýchaskesinde boldyq. Birde-bir zań buzýshylyq tirkelgen joq. Sailaý joǵary deńgeide uiymdastyryldy. Pandemiiaǵa bailanysty qazaqstandyq tarap qorǵanys zattaryn uiymdastyryp, qolǵap, maska taratty. Antiseptikalyq zattarmen zararsyzdandyryp otyrdy. Osynaý kúrdeli ýaqytta Qazaqstan sailaýdy qalai uiymdastyrǵanyn kórdik jáne ózge elder de qazaqstandyq tájiribeni qoldanady dep oilaimyn», - dedi ol.
RF Federaldy jinalysy Federaldy keńesiniń Halqaralyq ister jónindegi komiteti tóraǵasynyń orynbasary, joǵaryda atalǵan missiia múshesi Bair Jamsýev te Qazaqstandaǵy sailaýdyń joǵary deńgeide ótkendigin aitady.
«Keshe biz barlyq saiasi partiianyń shtabtarynyń ókilderimen kezdestik. Sailaý komissiialarynyń jumysyna, memlekettik bilik organdary tarapynan sailaýaldy naýqan jumysyna aralasýǵa qatysty birde-bir shaǵym estimedik. Sondyqtan da biz jumysymyzdyń qorytyndysy boiynsha sońǵy málimdememizde birde-bir zań buzýshylyqty nemese shaǵymdy atap óte almadyq. Missiiamyz sailaýdyń sailaý týraly Qazaqstannyń ulttyq zańnamasy men halyqaralyq normalardy qatań saqtai otyryp, joǵary uiymdastyrýshylyq deńgeide ótti dep baǵalaidy», - dedi Bair Jamsýev.
