Ujymdyq qaýipsizdik shart uiymy elderi aýǵan esirtkisine qarsy operatsiia júrgizedi. Bul týraly QR Ishki ister ministrliginiń resmi ókili Nurdildá Oraz málim etti, dep habarlaidy QazAqparat.
«Qazaqstannyń tóraǵalyǵymen Ujymdyq qaýipsizdik týraly shart uiymyna múshe memleketterdiń esirtkiniń zańsyz ainalymyna qarsy is-qimyl jónindegi quzyretti organdar basshylarynyń úilestirý keńesiniń 23-shi otyrysy ótti. Beinebailanys arqyly ótken otyrysqa Armeniia, Belarýs, Qazaqstan, Qyrǵyzstan, Tájikstan jáne Reseidiń esirtkige qarsy qurylymdarynyń basshylary qatysty. Keńes barysynda 2021 jylǵy yntymaqtastyqtyń qorytyndylary shyǵarylyp, odan ári ózara is-qimyldyń joldary belgilendi. Qazaqstannyń ishki ister ministriniń orynbasary Arystanǵani Zapparov óńirdegi «Aýǵan apiyny» eksportynyń ósýi yqtimaldyǵyna bailanysty atalǵan uiymǵa múshe elderdiń qaýipsizdigine tikelei áser etetin ótkir problemalardyń biri retinde Aýǵanstandaǵy jaǵdaiǵa basa nazar aýdardy»,- dedi Nurdildá Oraz IIM baspasóz alańynda ótken brifing barysynda.
Onyń atap ótýinshe, Ujymdyq qaýipsizdikke múshe memleketterdiń 2021-2025 jyldarǵa arnalǵan esirtkige qarsy strategiiasyn iske asyrý barysy talqylandy. «Arna-granit bastion» sýbóńirlik esirtkige qarsy operatsiiasynyń nátijelerine joǵary baǵa berildi. Arnaýly operatsiia Ortalyq Aziia elderi arqyly ótetin Aýǵan apiyny tranzitiniń «soltústik baǵytynda», sondai-aq Kavkaz-Qara teńiz baǵytynda jáne ujymdyq qaýipsizdikke múshe memleketter shekaralarynyń basqa da ýchaskelerinde ótti.
Birlesken jumys nátijesinde 773 esirtki qylmysy anyqtaldy. 5,5 tonnadan astam esirtki, onyń ishinde 5 kelige jýyq apiyn, 13 keli gashish, 12 keli geroin, 5 tonna marihýana, 22 keliden astam sintetikalyq esirtki tárkilendi»,- dedi ol.
Resmi ókildiń atap ótýinshe, aqparattyq-telekommýnikatsiialyq tehnologiialardy paidalana otyryp, zańsyz esirtki saýdasyna qarsy birlesip áreket etý jáne Internet jelisinde esirtkini nasihattaý yntymaqtastyq baǵytynyń biri bolyp aiqyndaldy.
«Sondai-aq «Kanal» esirtkige qarsy operatsiiasynyń úsh kezeńin ótkizý týraly sheshim qabyldandy. Birinshi kezeńi Qyrǵyz Respýblikasynda Halyqaralyq úilestirý shtabyn ornalastyra otyryp, «Kanal-ekinshi tosqaýyl» degen ataýmen; Ekinshi kezeń Resei Federatsiiasynda «Kanal-Nevskii qalqan», Úshinshi kezeń Belarýs Respýblikasynda «Kanal - Neman» degen ataýmen ótkiziledi», - dedi Nurdildá Oraz.
