UQShU Armeniia men Ázerbaijan shekarasyndaǵy qaqtyǵysqa qatysty pikir bildirdi, - dep habarlaidy Tengrinews.kz agenttigi.
"2022 jyldyń 13 qyrkúiegine qaraǵan túni Armeniia men Ázerbaijan shekarasynda aýyr qarý-jaraq jáne ushqyshsyz ushaqpen áskeri qaqtyǵystar boldy. Saldarynan qaza bolǵandar men jaralylar bar.
Kúsh qoldanýdy orynsyz dep sanaimyz. Qarama-qaishylyqtardy retteý úshin Ázerbaijan, Armeniia jáne Resei basshylarynyń 2020 jylǵy 9 qarashadaǵy, 2021 jylǵy 26 qańtardaǵy jáne 11 qarashadaǵy málimdemelerinde bekitilgen saiasi-diplomatiialyq ádister men ýaǵdalastyqtar ǵana paidalanylýy tiis.
Resei Federatsiiasynyń 13 qyrkúiek 9.00-den bastap bailanys jelisindegi atysty toqtatýdaǵy deldaldyq kúsh-jigerin joǵary baǵalaimyz.
Armian tarapynyń UQShU Ujymdyq Qaýipsizdik keńesine Armeniia Respýblikasyna kómek kórsetý týraly úndeýine bailanysty Uiymnyń hatshylyǵy UQShU Birikken shtabymen birlesip jaǵdaidy retteý úshin UQShU tetikterin iske qosý jónindegi jumysty uiymdastyrdy.
Qaza bolǵandardyń otbasylaryna qaiǵyryp kóńil aitamyz jáne jaralanǵandardyń tezirek saýyǵyp ketýin tileimiz", - delingen UQShU habarlamasynda.
Aita keteiik, 13 qyrkúiekke qaraǵan túni Armeniia men Ázerbaijan shekarasynda qaqtyǵys bastalǵan edi. Eki eldiń qorǵanys ministrlikteri qarama-qaishy aqparat taratyp jatyr.
Armeniia Qorǵanys ministrligi Ázerbaijan Qarýly kúshteriniń artilleriia men ushqyshsyz ushaqtar arqyly Armeniia territoriiasyn atqylai bastaǵanyn málimdedi. Al Ázerbaijan qorǵanys ministrligi armian áskeri aýqymdy arandatýshylyq jasady dep aiyptady.
Eske salaiyq, buǵan deiin Armeniia premer-ministri Nikol Pashinian Ázirbaijan Qarýly kúshterimen túngi qaqtyǵysta 49 armian áseri qyzmetshisi qaza tapqanyn aitqan bolatyn.
