Ýkrainanyń ulttyq qaýipsizdik jáne qorǵanys keńesiniń boljaýynsha, Tegeranda qulaǵan Ýkraina áýe kompaniiasynyń Boeing ushaǵy raketamen atyp túsirilýi múmkin. Keńes hatshysy Aleksei Danilov ushaqqa Reseide jasalǵan «Tor» zenittik-raketkalyq kompleksinen jiberilgen zymyran tiiýi múmkin degen boljam aitty.
Danilovtiń sózinshe, ýkrainalyq sarapshylar ushaqtyń apatqa ushyraýynyń tórt sebebin qarastyrady. Olar: zymyranmen atyp túsirý, ushqyshsyz ushaqpen soqtyǵysý, ushaq motorynyń janýy ne bort ishindegi terakt.
Danilov Tegeranǵa jetken ýkrainalyq mamandar qazir Iran biligimen ushaq apatqa ushyraǵan jerge barý jaǵyn aqyldasyp jatyr. Olar áýejai mańynan «Tor» zenittik-raketkalyq kompleksiniń synyqtaryn izdemek.
Batystaǵy arnaiy qyzmetter 9 qańtarda Reuters aqparat agenttigine ushaq tehnikalyq aqaý saldarynan apatqa ushyraǵanyn aitqan. Kanadalyq arnaiy qyzmettegi derekkóz ushaqtyń motory janyp ketýi múmkin degen.
9 qańtarda Iran biligi ushaq motory janyp, pilottar ushaqqa ie bola almai qalýy múmkin degen boljam jasady. Tegerannyń málimdeýinshe, «ushaq radardan joǵalyp ketkende 2500 metr biiktikte bolǵan. Pilottar eshqandai tótenshe jaǵdai jaily habarlamaǵan, biraq qaita áýejaiǵa oralýǵa tyrysqan».
Internette taraǵan videolarda ushaqtyq áýede órtene bastaǵany kórinedi.
Ýkrainanyń Irandaǵy elshiligi 8 qańtarda ushaq motordaǵy aqaýdan apatqa ushyrady dep habarlaǵan. Biraq elshilik biraz ýaqyttan soń bul habarlany alyp tastady «ushaqtyń apatqa ushyraýyna barlyq sebepti qarastyramyz» dep málimdedi.
8 qańtarda Tegerannan Kievke ushyp shyqqan ýkrainalyq jolaýshylar ushaǵy apatqa ushyrap, bortyndaǵy 176 adamnyń bári qaza tapqan. Ýkraina cyrtqy ister ministri Vadim Pristaikonyń sózinshe, ushaqta 82 irandyq, 63 kanadalyq, 10 shved, 4 aýǵan, 3 britandyq jáne Germaniianyń 3 azamaty bolǵan. Ýkraina qaýipsizdik qyzmeti apat saldarynan qaza tapqan 11 ýkraindyqtyń arasynda ekipajdyń toǵyz múshesi bar dep habarlady.
