Narazylardyń qarsylyǵyna tap bolyp, betine suiyqtyq shashylǵan burynǵy prezident Petro Poroshenko jaqtastarymen kezdesip jatyr. Tamyz aiy, 2021 jyl.
Ýkrainanyń burynǵy prezidenti Petro Poroshenko "oligarhtardyń saiasi yqpalyn azaitýǵa baǵyttalǵan" jańa zań talaptaryn oryndaý úshin eki telearnany qyzmetkerlerine satyp jibergenin habarlady. 2014-2019 jyldary Ýkrainany basqarǵan millioner 8 qarashada jariialaǵan videomálimdemesinde óziniń sondai qadamdarǵa barýǵa májbúr bolǵanyn aitty. Onyń málimdemesi "Eýropa yntymaqtastyǵy" partiiasynyń saitynda jariialandy, dep habarlaidy Azattyq.
Poroshenko málimdemesinde qazirgi prezident Vladimir Zelenskiidi "pikir erkindigin shektedi" dep aiyptady. 2024 jyly ótetin prezident sailaýyna qatysady delingen Poroshenkonyń pikirinshe, prezident keńsesi eldegi barlyq mediany ýysynda ustap turý úshin "oligarhtarǵa qarsy zańdy" qabyldap otyr.
2019 jylǵy prezident sailaýynda Poroshenkony jeńgen Zelenskii jyldar boiy úkimet, biznes, mediaǵa yqpal etip, memleket damýyn tejegen oligarhtardyń yqpalyn azaitýǵa ýáde bergen. 5 qarashada Zelenskii qol qoiǵan zańda oligarh uǵymyna da anyqtama berilgen. Zańǵa sáikes, ondaǵan million dollary bar belgili bir salada monopoliia ornatqan, media aktivteri bar saiasi yqpalǵa ie adamdar oligarhtar sanatyna kiredi.
AQSh jáne Eýroodaq uzaq ýaqyttan beri Ýkrainany halyq múddesine qaishy jumys istep kele jatqan oligarhtardyń áreketin tejeýge shaqyryp keledi. Alaida zań jobasyn synaýshylardyń pikirinshe, atalǵan qujat "jeke bastyń kegin alýǵa" jol ashady.
