Skrinshot: Novini LIVE
Ýkraina Prezidenti Vladimir Zelenskii, eger bul Ýkrainaǵa beibitshilik ákeletin bolsa, óz qyzmetinen ketýge daiyn ekenin málimdedi. Nemese «NATO-ǵa múshelikke aiyrbastaýǵa» ázir ekenin aityp, bilikte ondaǵan jyldar boiy qalýdy josparlamaitynyn jetkizdi, dep habarlaidy «Ýkrainskaia pravda».
Bul málimdemeni Zelenskii «Ýkraina. 2025 jyl» forýmynda ótken baspasóz máslihaty barysynda jasady. Sonymen qatar, ol Ýkrainadaǵy prezidenttik sailaý áskeri jaǵdai aiaqtalǵannan keiin ótetinin aitty.
Zelenskiidiń sózinshe, erteń Kievte eýropalyq kóshbasshylardyń qatysýymen sammit ótedi. Ol mańyzdy betburys kezeńi bolýy múmkin jáne kelissózderge Ýkraina, AQSh, Resei jáne EO qatysýy tiis.
Ýkraina basshysynyń aitýynsha, AQSh qaýipsizdik kepildikterinsiz atysty toqtatýdy talap etip otyr. Al Ýkraina mynandai kepildikterdi talap etedi: EO-ǵa múshe bolý, Batys qarjylandyratyn 800 myńdyq ýkrain armiiasyn qamtamasyz etý jáne el aýmaǵynda sheteldik kontingenttiń bolýy.
Prezident AQSh-tyń Ýkrainadan sirek kezdesetin metaldar týraly kelisimge qol qoiýyn talap etýine de túsinikteme berdi. Keibir derekkózderde bul kelisimge sáikes Kievtiń AQSh-qa 500 milliard dollar tóleý mindeti bar dep aitylýda. AQSh prezidenti Donald Tramp bul somany Vashingtonnyń Ýkrainaǵa keminde 350 milliard dollar kómek kórsetkenimen túsindiredi jáne ony ótemek niette.
Zelenskiidiń aitýynsha, Tramp AQSh bergen kómektiń ústine 100% ústeme aqy alǵysy keledi. Sondyqtan Ýkraina AQSh-qa 500 milliard nemese 100 milliard dollar qaryz ekenin moiyndaýdan bas tartady.
«Ýkraina AQSh-tan 100 milliard dollar kómek aldy, biraq 350, 500 nemese 700 milliard emes. Tipti 100 milliardty da qaryz dep moiyndaýǵa daiyn emespin, sebebi grant – bul qaryz emes. Men bul týraly Baidenmen kelisip qoiǵanmyn. Biz muny qaryz dep tanymaimyz», – dedi prezident.
Zelenskii sondai-aq «ýkrain halqynyń 10 býyny tóleitin kelisimge» qol qoimaitynyn atap ótti.
Osy arada AQSh prezidentiniń arnaiy ókili Stiven Ýitkoff CNN telearnasynyń efirinde AQSh Ýkrainamen sirek kezdesetin elementter boiynsha kelisimge kelesi aptada qol qoiady dep kútip otyrǵanyn málimdedi.
