video kadry
"Aq jol" demokratiialyq partiiasynyń plenýmy Ýkrainadaǵy soǵysty "arnaiy operatsiia" dep atap, Resei prezidenti Vladimir Pýtindi ashyq qoldaǵan depýtat Azamat Ábildaevty partiiadan shyǵardy, - dep habarlaidy "Ult aqparat" partiianyń saityna silteme jasap.
"Búgin Astanada "Aq jol" demokratiialyq partiiasy Ulttyq keńesiniń plenýmy ótti. Partiia tóraǵasy Azat Perýashevtyń tóraǵalyǵymen ótken jiynda Májilis depýtaty Azamat Ábildaevtyń jýrnalistke bergen suhbatynda Ýkrainadaǵy soǵys týraly aitqan sózderi saralanyp, tiisti saiasi baǵa berildi.
Ulttyq keńes músheleri Azamat Ábildaevtyń sózderi "Aq jol" partiiasynyń pozitsiiasyna qarama-qaishy ekenine, sonymen qatar partiialyq jáne de depýtattyq etikany da buzyp turǵanyna basa nazar aýdardy.
Keshe partiia prezidiýmy habarlaǵandai, “Aq jol” partiiasy qashan da respýblikamyzdyń, sondai-aq basqa da dos memleketterdiń táýelsizdigi men jer tutastyǵyn qurmetteidi jáne qoldaidy" - delingen habarlamada.
Baspasóz qyzmetiniń málimetinshe, Ulttyq keńes Azamat Ábildaevty "Aq jol" demokratiialyq partiiasynan shyǵarý týraly sheshim qabyldady. Sonymen qatar "Aq jol" partiiasy Azamat Ábildaevtyń depýtattyq mandatyn toqtatý týraly Ortalyq sailaý komissiiasyna hat joldady.
Aita keteiik, Azamat Ábildaev - 1998 jyldan "Aqbóken" qoǵamdyq qorynyń múshesi. 2015 jyldan Qalmaq tuqymynyń Respýblikalyq Palatasynyń tóraǵasy, 2021 jyldyń qyrkúiek aiynan "Qazaqstannyń Et Odaǵy" DKZTB basqarmasynyń tóraǵasy, Qazaqstannyń "Aq jol" Demokratiialyq partiiasynyń múshesi.
Eske salaiyq, keshe, 18 qańtarda Májilis depýtaty "Azattyq" radiosyna bergen suhbatynda Resei prezidenti Pýtindi qoldaitynyn ashyq aitqan. Ol sonymen birge Reseidiń Ýkrainaǵa basqynshylyǵyn "arnaiy operatsiia" dep ataǵan. Ábildaev buǵan qosa, Ýkraina prezidenti Vladimir Zelenskiidi jýyrda óz halqy ustap, sotqa beretinin jáne Parlamentte dál osylai oilaityn eki-úsh depýtat baryn aitty.
