Ýkrainadaǵy soǵysta AQSh-tyń taǵy bir azamaty qaza bolǵany anyqtaldy. Bul jóninde The Washington Post jazdy, dep habarlaidy Azattyq.
Basylym málimetine qaraǵanda, qaza bolǵan 52 jastaǵy adamnyń aty-jóni — Stiven Zabelski. Ol 15 mamyrda Zaporoje oblysyndaǵy Dorojnianka selosynyń mańyndaǵy urysta ólgen. Zabelski Ýkraina jaǵynda soǵysqa qatysqan. Rolling Stone málimetine qaraǵanda, AQSh áskeriniń ardageri minaǵa túsken.
AQSh memlekettik departamentti Zabelskiidiń qazasyn rastap, onyń otbasymen bailanysqanyn aitqan.
Ýkrainadaǵy soǵysta AQSh azamatynyń ólgeni týraly aqparat alǵash ret sáýir aiynda shyqqan. Ólgen adamnyń 22 jastaǵy burynǵy teńiz — jaiaý áskeri Ýill Djozef Kensel ekeni anyqtalǵan.
AQSh biliginiń málimetine qaraǵanda, Ýkrainadaǵy soǵys kezinde AQSh-tyń kemi úsh azamaty habarsyz ketken. Onyń ekeýi — Aleksandr Driýke men Endi Hiýn — 15 maýsymda Harkov túbindegi shaiqasta qolǵa túsken. "Interfaks" amerikalyqtar Donetsk abaqtysynda otyrǵanyn habarlaǵan.
Kreml ókili Dmitrii Peskovtyń sózinshe, separatistik "DHR-diń" olardy ólim jazasyna kespeitinine Máskeý kepildik bere almaidy. Resei biligi AQSh-tyń bul azamattaryna soǵys tutqyndary týraly Jeneva konventsiiasy júrmeitinin, óitkeni olardyń Ýkraina qarýly kúshteriniń qatarynda bolmaǵanyn aityp otyr.
