Birinshi sáýirde Ýkraina parlamenti № 7198 zań jobasyn tirkedi. Qujat: «qarýly qaqtyǵys saldarynan baspanasy tolyq ári jartylai zaqymdanǵan Ýkraina azamattaryna shyǵyndy óteý» dep atalady. Bul týraly «Habar 24» arnasy.
Osy zań aiasynda bilik Ýkraina turǵyndaryna bomba men zymyrannan qiraǵan baspana qunyn tóleý jaǵyn qarastyrmaq. Dei turǵanmen júz myńdaǵan ýkrainalyqqa on mln sharshy metrden asatyn baspana salyp berý soǵys búgin toqtai qalǵan kúnniń ózinde múmkin emes. Sondyqtan Joǵarǵy rada úileri jartylai qiraǵan azamattarǵa ótemaqy tóleý máselesin talqylap jatyr.
"Ýkraina Úkimeti men depýtattyq korpýs - halyqaralyq qaýymdastyqtan, onyń ishinde batystan donorlyq kómek uiymdastyrý máselesin qarastyryp otyr. Munda 150 myń baspana turǵyzý máselesi jii aitylady, óńirlik damý ministri de osy sandy únemi alǵa tartady. «Marshal jospary» aiasynda da baspanasy tolyq qiraǵan ýkraina azamattaryna úi salyp berý osy baǵytta iske asýy múmkin" - deidi ekonomist, Ulttyq bank saraptamalyq platformasynyń eks koordinatory Andrei Blinov.
Qurylysshylardyń kóbisi soǵystyń alǵashqy shebinde júr, sondyqtan Ýkrainada qazir maman jetispeidi, onyń ústine ai saiynǵy biýdjet tapshylyǵy besten segiz mlrd eýroǵa jetken, bul - qarajattyń kóp bóligi qorǵanys salasyna quiylyp jatyr degen sóz. Sondyqtan jańa úidi ýkrainalyqtar jyldap kútýi múmkin. Al bul qoǵamda narazylyq týdyryp, májbúrli migratsiia sanyn eselei túsýi yqtimal. Munyń aldyn alý úshin bilik jańa úiden buryn, ótemaqy máselesin aldaǵy bir aida sheshýi tiis, deidi ekonomister.
"Qazirgi kúni ýkrainalyqtar qiraǵan úilerine qaityp kelip, qaryzdanyp bolsa da jóndeý jumystaryn júrgizip jatyr. Alaida olar bilikten ótemaqy kútedi. Bilik qur ýáde berýmen shektelse, qoǵam taǵy dúrligýi múmkin ne bolmasa jumysy joq, úii joq ýkrainalyqtar jappai shet elge kóshe bastaýy múmkin" - deidi Blinov.
Parlamenttegi № 7198 zań jobasy qyrkúiek aiynda taǵy talqylaýǵa túspek. Bastapqy kezeńde Ýkrainanyń ár aimaǵyndaǵy 36 myń páterge jóndeý jumystaryn júrgizý úshin qarajat bólý máselesi qarastyrylmaq. Tolyǵymen jańa úi salyp berý jaily bilik talai ret aitqanmen, soǵys jaǵdaiynda bul múmkin emes. Óitkeni elde qarajat ta, qurylysshy da, qurylys materialdardy da tapshy.
