Seisenbi kúni tańerteń Ýkrainanyń ońtústigindegi Nikolaev qalasynda Resei zymyranynyń soqqysy saldarynan oblys ákimshiliginiń ǵimaraty qirady, dep habarlaidy Azattyq.
Qala meri Vitalii Kim soqqydan qiraǵan ǵimarattyń sýretin jariialady. Sýretten ǵimarattyń ortańǵy bóligi qiraǵany kórinedi. Qala meriniń aitýynsha, úiindi astynda segiz adam qalǵan bolýy múmkin. Jaralanǵandar bar.
Nikolaev qalasy aqpan aiynyń sońynan beri atqylaýǵa ushyrap keledi. Ázirge Resei áskeri qalaǵa basyp kirgen joq.
Keiingi aida Ýkrainadaǵy áleýmettik jelilerde Vitalii Kimniń tanymaldyǵy artty. Ol soǵys bastalǵaly beri kún saiyn qaladaǵy jaǵdai týraly rolikter túsirip, turǵyndardy jigerlendirýge tyrysady.
Seisenbi kúni Dnepropetrovsk oblysy aýmaǵyna da Resei áskeriniń zymyranmen birneshe soqqy jasaǵany belgili boldy. Oblystyń áskeri ákimshiliginiń jetekshisi Valentin Reznichenkonyń habarlaýynsha, Novomoskovsk aýdanynda zymyran oblystaǵy fermer sharýashylyǵy aýmaǵyna túsken, tehnika búlingen. Bir adam jaralanǵan. Pavlogradta zymyran kópirge túsip, jol qozǵalysy toqtaǵan. Nikopol aýdanyna da zymyran túsken. Ázirge tolyq emes aqparat boiynsha, qaza bolǵandar joq.
- Resei áskeri 24 aqpanda Ýkrainaǵa basyp kirgen. Pýtin Ýkrainany "denatsifikatsiia" jáne "demilitarizatsiialaý" maqsatynda kórshi elge "arnaiy operatsiia" bastaǵanyn málimdegen. BUU-ǵa múshe elderdiń basym bóligi oqiǵany Resei basqynshylyǵy dep atap, Máskeýden áskerin Ýkrainadan alyp ketýdi talap etken.
- Bir aidan astam ýaqytqa sozylǵan soǵys kezinde Ýkrainanyń kóptegen qalasy atqylaýǵa ushyrady. Eldiń biraz bóligin Resei áskeri basyp aldy. Qaza bolǵandar týraly naqty málimet joq. Sarapshylar myńdaǵan adam qaza bolýy múmkin deidi. Ýkrainanyń ondaǵan qalasynda turǵyn úiler, mektepter, aýrýhanalar jáne ózge de nysandar qirady.
