Ýkrainada arnaiy operatsiia barysynda "Pýtinge jaqyn" depýtat Viktor Medvedchýk ustaldy. Bul týraly Ýkraina prezidenti Vladimir Zelenskii habarlady.
Aqpannyń sońynda reseishil saiasatker úiqamaqtan qashyp ketken.
"Ýkraina qaýipsizdik kúshteri arnaiy operatsiia ótkizdi! Jaraisyńdar! Tolyǵyraq jaqynda belgili bolady. Ýkraina alǵa!" dep jazdy Zelenskii.
Qaýipsizdik qyzmetiniń baspasóz qyzmeti ustalǵan er adamnyń taǵy bir sýretin jariialap, Medvedchýk Zelenskiidiń tapsyrmasymen quryqtalǵanyn málimdedi.
"Birde-bir satqyn jazasyz qalmaidy jáne ol úshin Ýkraina Zańyna sáikes jaýap beredi", - deidi Ivan Bakanov.
Keiinirek Zelenskii videoúndeý jasap, Medvedchýkti orys tutqynyna túsken ýkrainalyqtarǵa aýystyrýdy usyndy.
"Medvedchýk myrza kosmonavtika kúni ustalǵany óte qyzyq boldy. Ol 48 kún boiy jasyrynyp júrip, aqyry bizdiń memleketten qashýdy uiǵardy. Áskeri kamýfliaj kiip ózin jasyryp qalǵysy kelgen (...)", - deidi Zelenskii.
Kreml spikeri Dmitrii Peskov TASS agenttigine Medvedchýktiń ustalǵanyna qatysty sýretti kórgenin, biraq onyń qanshalyqty ras ekenin aita almaitynyn málimdedi. Peskov sýretti tekserý kerek dep esepteidi.
Aita keteiik, "Oppozitsionnaia platforma – Za jizn" partiiasy saiasi keńesiniń tóraǵasy Viktor Medvedchýk – Resei prezidenti Vladimir Pýtinmen tyǵyz bailanys ornatqan ýkrain saiasatkeri. 2004 jyly Vladimir Pýtin Medvedchýktiń kishi qyzy Dariiaǵa ókil áke atanǵan.
19 aqpanda Medvedchýk pen onyń áieli Oksana Marchenkonyń múlkine sanktsiia jariialandy.
Medvedchýk Ýkrainada memleketti satty degen aiyppen táýlik boiy úiqamaqta otyrǵan, alaida keiin ony baqylaýda ustaý ádisi ózgergen. 26 aqpanda Bas prokýratýra Ulttyq politsiiaǵa Medvedchýktiń úimaqta bar-joǵyn tekserýdi tapsyrǵan, alaida saiasatker ornynda bolmai shyqqan.
