Ýkrainanyń jemqorlyqpen kúres jónindegi ulttyq biýrosy burynǵy prezident Petr Poroshenkonyń saiasi serigi Oleg Hladkovskiidi ustady. Ol "qyzmettik ókiletin asyra paidalandy" degen kúdikke ilindi.
Biýro Facebook-taǵy paraqshasynda ulttyq qaýipsizdik jáne qorǵanys keńesi hatshysynyń burynǵy orynbasary Oleg Hladkovskiidiń kinási dáleldense, segiz jylǵa deiin bas bostandyǵynan airylýy múmkin ekenin habarlady. Tergeý qupiialylyǵyna bailanysty istiń jai-japsary aitylmaidy.
Buǵan deiin parlamenttiń burynǵy depýtaty Sergei Leshenko áleýmettik jelide jemqorlyqpen kúres ulttyq biýrosynyń Oleg Gladkovskiidi Kiev áýejaiy mańyndaǵy meiramhanada ustaǵanyn habarlaǵan.
Ýkrainanyń ulttyq qaýipsizdik jáne qorǵanys keńesi hatshysynyń orynbasary qyzmetin atqarǵan Oleg Gladkovskiidi Poroshenko naýryz aiynda otstavkaǵa jibergen. Ol kezde jemqorlyq týraly jýrnalistik zertteý jariialanyp, sheneýniktiń "iri aqsha jymqyrý isine" qatysy bolýy múmkin ekeni aitylǵan. Ýkrainadaǵy prezident sailaýyna bir ai qalǵan kezde daý-damai órship, Poroshenkonyń sailaý kampaniiasyna de keri áserin tigizgen.
