Ýkrainalyq belsendiler kirill álipbiinen latyn qarpine kóshýdi usyndy. Mundai ashyq hat Ýkraina prezidenti Petr Poroshenkonyń saitynda jariialanǵan.
Ashyq hat avtorlarynyń málimetinshe, latyn qarpine ótý ýkrainalyqtardyń eýropalyq oi-piǵylyn bildiredi.
"Bul ýkrain tiliniń álem boiynsha damýyna áser etedi, sebebi ony sheteldikter ońai qabyldap, oqi bastaidy, informatsiialyq tehnologiialar salasyndaǵy basymdyqtary da ushan-teńiz", - deidi avtorlar.
"Segodnia.ua" portalynyń málimetinshe, Ýkrainada kiril qarpinen arylý týraly másele osymen 400 jylǵa jýyq ýaqyt talqylanyp keledi. Osy baǵytta sońǵy qadamdar 2010 jyly jasalǵan sol kezde Ýkraina biligi pasporttardy berý úshin arnaiy ýkrain álipbiin latynǵa kóshirýdegi erejeni bekitken. Al mamandar latyn qarpine ótýge túbegeili qarsy shyǵyp otyr.
"Bul tildiń qasietterin joǵaltady, - deidi aýdarmashy Anatolii Omelchenko. - Bizde belorýsten keiingi slavian tilderi arasynda minsiz grafika júiesi bar ekinshi til. Iaǵni áripterdiń 90 paiyzy dybysqa sai keledi, iaǵni ne estisek, sony jazamyz. Latyn bolsa jazý júiesin kúrdelendiredi".
