©Sipa / Scanpix
Ýkrainada soǵys bastalǵaly beri qaza tapqany anyqtalǵan beibit turǵyn sany jeti myńnan asty. Bul derek BUU adam quqyqtary jónindegi Joǵarǵy komissarynyń jańa baiandamasynda aitylǵan.
Baiandamada "bul qujatqa qattalyp, qazasy rastalǵan adamdar ǵana, biraq keskilesken shaiqas bolǵan aimaqtarda (Mariýpol, Severodonetsk, Lisichansk, Soledar men Bahmýt) ólgender sany budan da kóp bolýy ábden múmkin, ol jaqtan soǵys kezinde tolymdy aqparat alý múmkin emes" dep jazylǵan.
BUU dereginshe, Resei basqynshylyǵy bastalǵan 2022 jyldyń 24 aqpanynan biylǵy 16 qańtarǵa deiin Ýkrainada 7031 beibit turǵyn, onyń ishinde 433 bala qaza tapqan. Sondai-aq 11327 adam jaralanǵan, onyń 827-si – bala. Marqumdardyń 90 paiyzdan astamy Ýkraina biligi baqylaityn aýmaqta ólgen.
Buǵan deiin Resei zymyrany túsip, tutas bir podezi túgel qiraǵan Ýkrainanyń Dnepr qalasyndaǵy turǵyn úide bolǵan jarylystan qaza tapqandar sany 40 adamǵa jetti. Keiingi málimetke qaraǵanda, qaza bolǵandar arasynda úsh bala bar, taǵy otyzǵa jýyq adamnyń taǵdyry áli belgisiz. Qiraǵan úidiń ornynan 39 adam qutqarylǵan. Jarylys saldarynan jaralanǵan 75 adamnyń arasynda 14 bala bar.
