Foto: elements.envato.com
Elshiliktiń málimetinshe, Ýkraina aýmaǵynda 200-ge jýyq Qazaqstan azamaty bar. Bul týraly Premer-ministrdiń orynbasary - Syrtqy ister ministri Muhtar Tileýberdi málimdedi, - dep habarlaidy Tengrinews.kz agenttigi.
"Osyndai jaǵdaida aqparat jinaý óte qiyn. 600-800 azamat tirkelgen kezde basqasha. Al qazir soǵys qimyldary júrip jatqanda jáne kóptegen azamattar Ýkrainadan óz betimen ketip bara jatqanda, bul óte qiyn. Elshilik málimetinshe, Ýkraina aýmaǵynda 200 Qazaqstan azamaty bolýy múmkin", - dedi Tileýberdi Senat otyrysynda.
Ol bizdiń azamattardyń negizgi bóligi Ýkrainadan shyǵyp ketkenin túsindirdi. Polsha jáne Moldovamen shekaralar evakýatsiia úshin ashyq.
"Bizdiń elshilik shekaradan ótken kezde kómek kórsetedi. Elshilik tolyq evakýatsiialai almaidy. Birinshiden, Ýkrainadaǵy qazirgi jaǵdaida biz diplomatiialyq qyzmetkerlerimizdiń ómiri men qaýipsizdigine qaýip tóndire almaimyz. Diplomattardyń kópshiligi qazir Varshavaǵa (Polsha. - Eskertý) qaita ornalastyryldy. Olar óz qyzmetin sol jerden júrgizedi", - dedi Tileýberdi.
Ol Kievte Qazaqstannyń konsýly qalǵanyn, ol qazir Ýkrainada júrgen azamattarymyzdy kúndelikti qabyldaitynyn túsindirdi.
"Ol jerde kóptegen adamdar kómek surap barady. Tolyq evakýatsiialaý nemese elshilikti ýaqytsha jabý týraly aitýǵa negiz joq", - dedi ministr.
