Ýkraina jýrnalisteri 2022 jylǵy Pýlittser syilyǵynyń "Airyqsha ataý" nominatsiiasynda arnaiy júldemen marapattaldy, dep habarlaidy Azattyq.
Uiymdastyrý komiteti málimdemesinde Ýkraina jýrnalisterine kásibine adaldyǵy úshin alǵys bildirgen: "Pýlittser komissiiasy Ýkraina jýrnalisterine óz eline Vladimir Pýtinniń jasaǵan aiaýsyz basqynshylyǵy men Reseidegi onyń propagandalyq soǵysy kezinde tanytqan erjúrektigi, tabandylyǵy men shynaiy habar taratqany úshin "Airyqsha ataý" júldesin tabystaidy. Olar atys-shabysqa, urlap áketýge, okkýpatsiiaǵa jáne tipti áriptesteriniń qazasyna da qaramastan, bolyp jatqan sumdyq jaǵdaidy qaz-qalpynda, dál berýdi jalǵastyryp, Ýkrainaǵa jáne kúlli álem jýrnalisterine qurmet tanytyp otyr".
Amerikanyń jýrnalistika salasyndaǵy eń bedeldi júldesi – Pýlittser syilyǵynyń biylǵy laýreattarynyń aty-jóni 9 mamyrda AQSh-ta jariialandy.
Pýlittser syilyǵynyń "Qoǵamǵa qyzmet etkeni úshin" dep atalatyn bas nominatsiiasyn amerikalyq The Washington Post gazetine tabys etti. Basylym 2021 jylǵy 6 qańtarda sol kezde el prezidenti bolǵan Donald Tramptyń jaqtastarynyń Kapitoliige shabýyl hronologiiasyn egjei-tegjeili túrde baiandaǵany úshin osy júldege ie boldy.
Amerikalyq taǵy bir basylym New York Times gazetiniń redaktsiiasyna halyqaralyq jáne ulttyq deńgeidegi reportajdary úshin syilyq berildi. Birinshi materialda Taiaý Shyǵysta amerikalyq áskerilerdiń qarý qoldanýynan beibit turǵyndardyń qaza tapqany, al ekinshi maqalada politsiia ustaǵan kezde amerikalyq kólik júrgizýshilerdiń mert bolǵany baiandalady.
Sonymen birge Pýlittser syilyǵynyń ózge de nominatsiialary boiynsha The Miami Herald, The Tampa Bay Times, Getty Images, The Los Angeles Times jáne basqa basylymdardyń jýrnalisteri marapattaldy.
