© Reuters
Ulybritaniia premer-ministri Boris Djonson seisenbide Ýkrainanyń Joǵarǵy Radasynda sóz sóilep, Kievke áskeri kómektiń jańa paketin jariialady, - dep habarlaidy Tengrinews.kz agenttigi Euronews saityna silteme jasap.
Onyń aitýynsha, áńgime jalpy quny 300 million fýnt sterling bolatyn radarlar, ushqyshsyz ushatyn apparattar men shabýyl qarýlary týraly bolyp otyr.
"Biz uzaq merzimdi maqsatymyzǵa jetkenshe sizderdiń basqa dostaryńyz sekildi Ýkrainany qarý-jaraqpen, qarajatpen jáne gýmanitarlyq kómekpen qamtamasyz etýdi jalǵastyramyz. Biz Ýkrainany sizderge endi eshkim eshqashan shabýyl jasaýǵa batyly barmaityndai etip kúsheitýimiz kerek", - dedi Djonson.
Ulybritaniia premer-ministri qazir Ýkraina Reseidi jeńetinine senimdi ekenin aitty. Onyń pikirinshe, shabýyldy bastaý arqyly Pýtin ólimge ákeletin qatelik jasady jáne sonyń saldarynan óz eliniń álsizdigin kórsetti. Djonson "agressordyń qatygez kúshi bostandyq tańdaǵan halyqqa eshteńe istei almaidy" dep atap ótti.
"Ýkrainalyqtar óz tabandylyǵymen, qurbandyqtarymen óz táýelsizdigi úshin kúresip jatqan halyqty myltyq pen tank basa almaitynyn dáleldedi, sondyqtan men Ýkraina jeńetinine senemin", - dep keltirdi saiasatkerdiń sózin "Evropeiskaia pravda".
"Ýkraina reseilik agressiiaǵa qarsy tura otyryp, Pýtin jeńilmeitini týraly mifti joidy", - dep qosty Ulybritaniia premer-ministri.
