Chernigov oblysy Iagodnoe mektebindegi jertólede otyrǵan aýyl turǵyndary. Sýret Resei áskeri aýyldan ketken kúnniń erteńine túsirilgen. Soǵys kesirinen baspanasyz qalǵan adamdar basqa barar jeri joǵyn aitady. Ýkraina, 31 naýryz 2022 jyl.
Ýkraina bas prokýrory Irina Venediktova Resei qarýly kúshteriniń 9 áskeri qyzmetkeri Ýkrainanyń Chernigov oblysy Iagodnoe aýylynyń beibit turǵyndaryn óltirdi degen kúdikke ilingenin aitty. Venediktova Resei quramyndaǵy Týva respýblikasynan shyqqan bul toǵyz adamnyń aty-jónin Facebook’tegi paraqshasynda jariialady, dep habarlaidy Azattyq.
Olardyń barlyǵy Reseidiń №55115 áskeri bóliminde qyzmet atqarady. Ýkraina Bas prokýratýrasy bul toǵyz reseilik sarbazǵa "beibit adamdardy azaptap, óltirgen" degen aiyp taǵyp otyr.
"Olar Iagodnoe aýyly turǵyndaryn jasyrynyp otyrǵan jerinen shyǵarǵan. Adamdardy aiazǵa qaramastan sheshindirip, denesinde patriottyq tatý bar-joǵyn, áskeri ish-kiim kigen-kimegenin teksergen. Turǵyndardyń telefonyn tartyp alǵan. Eger tyǵyp qoiǵany anyqtalsa, árbir besinshi er azamatty óltiretinin aitqan" deidi Venediktova.
Onyń sózinshe, naýryzda reseilik áskeriler Iagodnoe mektebiniń jertólesine 300-ge jýyq adamdy (arasynda 77 bala bar) qamaǵan. Olardy 20 kún boiy tiri qalqan retinde ustaǵan deidi Ýkraina bas prokýrory.
"Tutqyndardyń eń kishisi – bir jarym ailyq, úlkeni – 93 jasta. Barlyǵyn tar qapasta, qarańǵy ári las, aýa jetpeitin jerde adam tózgisiz jaǵdaida ustaǵan ash ustaǵan, sý bermegen" dep jazady Venediktova.
Onyń deregi boiynsha, reseilik áskeriler kepil retinde qamap ustaǵan osy adamdardan 10 azamat adam tózgisiz jaǵdaidy kótere almai kóz jumǵan. Taǵy 17 adamdy áskeriler óltirgen. Tutqynda bolǵandar qaza tapqandardyń aty-jónin sol jertóleniń qabyrǵasyna jazyp otyrǵan.
"Resei áskeri ólgender sany bes adamǵa jetpeiinshe, marqumdardy jerleýge tyiym salǵan. Osy tyiymdy buzǵandarǵa oq atqan. Turǵyndar qazýly kórge jasyrynýǵa májbúr bolǵan" deidi Ýkraina bas prokýrory.
Qazirgidei soǵys jaǵdaiynda bul aqparatty jan-jaqty tekserý múmkin bolmady.
Resei Ýkrainaǵa soǵys ashqannan keiin Chernigov oblasynyń bir bóligin jaýlap alǵan edi. Sáýir aiynda basqynshylar kúshteri ol aimaqtan ketti.
