چەرنيگوۆ وبلىسى ياگودنوە مەكتەبٸندەگٸ جەرتٶلەدە وتىرعان اۋىل تۇرعىندارى. سۋرەت رەسەي ەسكەرٸ اۋىلدان كەتكەن كٷننٸڭ ەرتەڭٸنە تٷسٸرٸلگەن. سوعىس كەسٸرٸنەن باسپاناسىز قالعان ادامدار باسقا بارار جەرٸ جوعىن ايتادى. ۋكراينا, 31 ناۋرىز 2022 جىل.
ۋكراينا باس پروكۋرورى يرينا ۆەنەديكتوۆا رەسەي قارۋلى كٷشتەرٸنٸڭ 9 ەسكەري قىزمەتكەرٸ ۋكراينانىڭ چەرنيگوۆ وبلىسى ياگودنوە اۋىلىنىڭ بەيبٸت تۇرعىندارىن ٶلتٸردٸ دەگەن كٷدٸككە ٸلٸنگەنٸن ايتتى. ۆەنەديكتوۆا رەسەي قۇرامىنداعى تۋۆا رەسپۋبليكاسىنان شىققان بۇل توعىز ادامنىڭ اتى-جٶنٸن Facebook’تەگٸ پاراقشاسىندا جارييالادى, دەپ حابارلايدى ازاتتىق.
ولاردىڭ بارلىعى رەسەيدٸڭ №55115 ەسكەري بٶلٸمٸندە قىزمەت اتقارادى. ۋكراينا باس پروكۋراتۋراسى بۇل توعىز رەسەيلٸك ساربازعا "بەيبٸت ادامداردى ازاپتاپ, ٶلتٸرگەن" دەگەن ايىپ تاعىپ وتىر.
"ولار ياگودنوە اۋىلى تۇرعىندارىن جاسىرىنىپ وتىرعان جەرٸنەن شىعارعان. ادامداردى ايازعا قاراماستان شەشٸندٸرٸپ, دەنەسٸندە پاتريوتتىق تاتۋ بار-جوعىن, ەسكەري ٸش-كيٸم كيگەن-كيمەگەنٸن تەكسەرگەن. تۇرعىنداردىڭ تەلەفونىن تارتىپ العان. ەگەر تىعىپ قويعانى انىقتالسا, ەربٸر بەسٸنشٸ ەر ازاماتتى ٶلتٸرەتٸنٸن ايتقان" دەيدٸ ۆەنەديكتوۆا.
ونىڭ سٶزٸنشە, ناۋرىزدا رەسەيلٸك ەسكەريلەر ياگودنوە مەكتەبٸنٸڭ جەرتٶلەسٸنە 300-گە جۋىق ادامدى (اراسىندا 77 بالا بار) قاماعان. ولاردى 20 كٷن بويى تٸرٸ قالقان رەتٸندە ۇستاعان دەيدٸ ۋكراينا باس پروكۋرورى.
"تۇتقىنداردىڭ ەڭ كٸشٸسٸ – بٸر جارىم ايلىق, ٷلكەنٸ – 93 جاستا. بارلىعىن تار قاپاستا, قاراڭعى ەرٸ لاس, اۋا جەتپەيتٸن جەردە ادام تٶزگٸسٸز جاعدايدا ۇستاعان اش ۇستاعان, سۋ بەرمەگەن" دەپ جازادى ۆەنەديكتوۆا.
ونىڭ دەرەگٸ بويىنشا, رەسەيلٸك ەسكەريلەر كەپٸل رەتٸندە قاماپ ۇستاعان وسى ادامداردان 10 ازامات ادام تٶزگٸسٸز جاعدايدى كٶتەرە الماي كٶز جۇمعان. تاعى 17 ادامدى ەسكەريلەر ٶلتٸرگەن. تۇتقىندا بولعاندار قازا تاپقانداردىڭ اتى-جٶنٸن سول جەرتٶلەنٸڭ قابىرعاسىنا جازىپ وتىرعان.
"رەسەي ەسكەرٸ ٶلگەندەر سانى بەس ادامعا جەتپەيٸنشە, مارقۇمداردى جەرلەۋگە تىيىم سالعان. وسى تىيىمدى بۇزعاندارعا وق اتقان. تۇرعىندار قازۋلى كٶرگە جاسىرىنۋعا مەجبٷر بولعان" دەيدٸ ۋكراينا باس پروكۋرورى.
قازٸرگٸدەي سوعىس جاعدايىندا بۇل اقپاراتتى جان-جاقتى تەكسەرۋ مٷمكٸن بولمادى.
رەسەي ۋكرايناعا سوعىس اشقاننان كەيٸن چەرنيگوۆ وبلاسىنىڭ بٸر بٶلٸگٸن جاۋلاپ العان ەدٸ. سەۋٸر ايىندا باسقىنشىلار كٷشتەرٸ ول ايماقتان كەتتٸ.
