Ýkrainanyń qorǵanys jáne qaýipsizdik keńesi Reseimen bailanysy bar saiasi partiialardyń jumysyn toqtatty. Bul jóninde Ýkraina prezidenti Vladimir Zelenskii málimdedi. Tizimde buryn reseishil saiasatker Viktor Medvedchýk jetekshilik etken "Oppozitsiialyq platforma – Ómir úshin", «Sharii partiiasy" sekildi saiasi uiymdar bar, dep habarlaidy Azattyq.
"Jikke bóletin nemese kollaboratsiiaǵa aparatyn saiasatkerlerdiń isinen eshteńe shyqpaidy, olarǵa qatań jaýap beriledi. Reseimen soǵys jaǵdaiyn jáne osy elmen saiasi bailanystaryn eskere otyryp, birqatar saiasi partiialardyń jumysyn toqtattyq", – dedi Zelenskii.
Jumysy toqtatylǵan partiialar tizimi (jaqsha ishine ýkrain tilindegi ataýy jazyldy - red.):
"Oppozitsiialyq platforma – Ómir úshin" ("Opozitsiina platforma – Za jittia")
"Sharii partiiasy" ("Partiia Shariia")
"Bizdiki" ("Nashi")
"Oppozitsiialyq blok" ("Opozitsiinii blok")
"Solshyl oppozitsiia" ("Liva opozitsiia")
"Solshyl kúshter odaǵy" ("Soiýz livih sil")
"Memleket"("Derjava")
"Ýkraina progressivti sotsialistik partiiasy" ("Progresivna sotsialistichna partiia Ýkraїni")
"Ýkraina sotsialistik partiiasy" ("Progresivna sotsialistichna partiia Ýkraїni")
"Sotsialister" partiiasy (partiia "Sotsialisti")
"Volodimir Saldo blogy" ("Blok Volodimira Saldo")
"Oppozitsiialyq platforma – Ómir úshin" partiiasy Joǵarǵy radadaǵy iri oppozitsiialyq fraktsiiany baqylaǵan. Bul partiiany opponentteri "Reseidiń Qyrymdy anneksiialaǵanyna ish tartty jáne Ýkraina shyǵysyndaǵy separatisterdi qoldady" dep aiyptaidy.
Bul partiia jetekshiligi Resei Ýkrainaǵa basyp kirgende Ýkrainany qorǵaitynyn, urys qimyldary júrip jatqan aimaqtarda Ýkraina azamattaryna qoldaý kórsetetinin málimdegen.
Partiianyń burynǵy jetekshisi Viktor Medvedchýkti 2021 jyldyń qazan aiynda memleketke satqyndyq jasady dep aiyptaǵan. Tergeý kezinde "ózin ózi jariialaǵan "DHR" men "LHR-dan" keletin kontrabandalyq kómirmen bailanysy bar" degen kúdik aitylǵan. Ýkraina Bas prokýratýrasy Medvedchýktiń Máskeýmen bailanysy Ýkrainanyń 2014-2015 jyldardaǵy ekonomikalyq qaýipsizdigine nuqsan keltirdi dep aiyptaidy.
Úiqamaqqa alynǵan Medvedchýktiń biyl aqpan aiynda qashyp ketkeni málim boldy. Advokat sózine qaraǵanda, Medvedchýk Kievtegi qaýipsiz orynǵa ketken. 18 naýryzda Lvov soty ony qamaýǵa alý jóninde syrttai sheshim shyǵarǵan.
Medvedchýktiń Resei prezidentimen de bailanysy bar. 2004 jyly Vladimir Pýtin Medvedchýktiń qyzyna ókil áke bolǵan.
"Sharii partiiasynyń" negizin qalaýshy – tanymal videobloger Anatolii Sharii. Eýropa odaǵyna ketip, 2012 jyly saiasi baspana alǵan. 2014 jyldan beri Sharii Ýkraina biligin, Maidandy qoldaýshylardy Máskeýmen durys qatynas jasamady dep qatań synap keledi. Keiingi kezderi Ýkraina prezidentin synaýdy kúsheitken.
