Qazaqstan qoǵamdyq damý institýtynyń sarapshysy Juldyzai Ysqaqova Ýkrainadaǵy jaǵdai týraly pikir bildirdi, dep habarlaidy QazAqparat.
«Qazir Qazaqstannyń ustanymy bárine túsinikti jáne ol qandai da bir ózgeriske ushyraidy dep oilamaimyn. Biz neitralitet ustanamyz jáne qos tarapty beibitshilikke shaqyramyz. Bul ustanymdy Senat spikeri Úkimet deńgeiinde aitqan bolatyn. Ol birinshi kezekte kópvektorly qaǵidatty ustanatyn Qazaqstannyń syrtqy saiasaty tujyrymdamasynda negizdelgen. Bul barlyq taraptarmen odaqtastyq qatynas baryn bildiredi. Biz úshin balansty saqtaý óte mańyzdy, óitkeni bul buryn-sońdy bolmaǵan óte kúrdeli geosaiasi jaǵdai. Munda Qazaqstan shalt qadamǵa barmaýy kerek, qandai da bir tarapty jaqtamaýy kerek. 30 jyl boiy biz kópvektorly júieni qoldanyp keldik jáne ol bizge tek artyqshylyqtar berdi. Sondyqtan qazirgi jaǵdaiǵa tek ulttyq múddelerimizdi eskere otyryp ún qatý kerek. Bizde Qazaqstanda Reseimen týystyq bailanysy bar 3 mln-nan astam orys, Ýkrainamen bailanystyratyn 300 myńnan astam ýkrain bar. Negizinen, barlyǵymen diplomatiialyq qatynastar ornatylǵan. Sondai sezimtal shekarany saiasatkerlerimiz eshqandai jaǵdaida buzbaýy kerek. Qoǵamymyz da oqiǵany baǵalar kezde, qandai da bir tarapty jariia túrde qatań synaýda saq bolǵany jón. Ony ózimizdiń jeke emotsiialarymyzdan emes, ulttyq múddelerimizdi saqtaýdan bastaýymyz kerek», - dep túsindirdi sarapshy.
Óz pikirinde Juldyzai Ysqaqova Qazaqstan biliginiń ustanymy aqylǵa qonymdy dep sanaidy.
«Biliktiń ustanymyn syndarly dep aitýǵa bolady. Qaýipsizdik Keńesiniń otyrysy ótti, ujymdyq sheshim qabyldandy, meniń oiymsha, beitaraptyq ustanym men taraptardy dialogqa shaqyrý – óte oryndy. Bizdiń jaqsy tájiribemiz bar – Siriia protsesi Qazaqstanda ótken bolatyn. Kezinde Resei men Túrkiiany da kelissózder ústeline otyrǵyzdyq. Osyndai janjaldardyń mediatory retinde jii bastama kóterdik. Meniń oiymsha, bul taktika óte durys. Bizdiń mindetimiz – taraptar qaqtyǵysty diplomatiialyq deńgeide sheshý úshin barlyq múmkindikti paidalaný», - dedi sarapshy.
Sondai-aq, sarapshy Resei-Ýkraina qaqtyǵysynyń qashanǵa sozylatyny týraly pikir bildirdi.
«Soǵystyń merzimi týraly kesip aitýǵa bolmaidy, biraq sońǵy onjyldyqta baýyrlas memleketter qarym-qatynasy dál osylai shielenispegen edi. Soǵystyń ózinen buryn keiingi saldary uzaqqa sozylady. Munyń saldary búkil postkeńestik keńistikti sharpýy múmkin. Qazir bizdiń mindetimiz – eń nashar stsenariige daiyndalý, árine oqiǵa basqasha órbýi de múmkin. Iaǵni, biz azamattarymyzdy barynsha qorǵaý úshin daǵdarysqa qarsy sharalar qabyldaýǵa tiispiz. Qazir Úkimetke úlken ról júktelgen – olar ázirlegen daǵdarysqa qarsy jospardy únemi tekserip otyrýy kerek, óitkeni jaǵdai ózgerip, Reseige jańa sanktsiialar salynyp jatyr. Onyń bárine daiyn bolýymyz kerek. Úkimettegi sarapshylarymyz oqiǵanyń túrli boljamyna súiendi jáne daiyndyqty pysyqtap jatyr», - dep esepteidi sarapshy.
Spiker Qazaqstan úshin Resei-Ýkraina janjalynyń qandai saldary bolýy múmkin ekenin aitty.
«Bilik biz múshelik etetin UQShU kontingenti bul protsesterge qatyspaidy dep málimdedi, óitkeni bul oqiǵa memlekettik kelisimde bolmaǵan. Muny BUU sheshýi kerek. Bul turǵydaǵy másele sheshildi. Taǵy bir nárse – bul halyqqa ekonomikalyq turǵydan, iaǵni infliatsiiamen, teńge baǵamymen bailanysty áser tigizýi múmkin. Munyń bári, árine, azamattardyń ekonomikalyq jaǵdaiyna áser etedi. Bizde rezervter men Ulttyq qor bar. Biliktiń málimdemesine súiensek, munai aqshasy Ulttyq qorda saqtalǵan. Sondyqtan bizde «qaýipsizdik jastyqshasy» bar. Biýdjet pen resýrstarymyz bar. Munda dúrbeleńge boi aldyrmai, resýrstardy durys bólý kerek. Bul jaǵdaida sybailas jemqorlyqqa qarsy organ, quqyq qorǵaý organy naqty jumys isteýi kerek. Qaýipsizdik – birinshi orynda, sodan keiin – ekonomika, sondyqtan azamattar osyndai kúrdeli geosaiasi jaǵdailarda ózderiniń qorǵalǵanyn sezinýi tiis», - dedi Juldyzai Ysqaqova.
