3 qyrkúiekte Ýkraina parlamenti - Joǵarǵy rada Konstitýtsiiaǵa halyq depýtattarynyń tiispeýshilik quqyǵyn shekteitin ózgertýler engizdi. Keminde úsh júz depýtattyń maquldaýyn qajet etetin sheshimdi parlamenttiń 373 múshesi qoldap daýys berdi. Bul týraly Azattyqtyń Ýkrain qyzmeti habarlady.
Joǵarǵy Rada «Ýkraina Konstitýtsiiasynyń 80-babyna ózgerister engizý týraly» zańdy, iaǵni depýtattardyń aiyryqsha quqyǵyn joiýdy ekinshi oqylymda qabyldady. Atalǵan zań 2020 jylǵy 1 qańtardan kúshine enedi.
30 tamyzda osy zań jobasy birinshi oqylymda qabyldanǵan. Seisenbidegi talqylaý kezinde reglamenttiń buzylǵanyn alǵa tartqan reseishil ustanymdaǵy "Oppozitsionnaia partiia – Za jizn" partiiasynyń depýtattary jobaǵa qarsylyq bildirip, daýys berýge qatysýdan bas tartqany týraly TASS agenttigi habarlady.
Depýtattyń tiispeýshilik quqyǵyn shekteý týraly zań jobasyn osyǵan deiingi shaqyrylymdaǵy parlamentke sol kezdegi prezident Petr Poroshenko engizgen. Jobada Konstitýtsiiadan Joǵarǵy radanyń kelisiminsiz depýtatty ustaýǵa, tutqyndaýǵa nemese qylmystyq jaýapkershilikke tartýǵa bolmaityny týraly normany alyp tastaý usynylǵan.
2018 jylǵy maýsymda Ýkraina konstitýtsiialyq soty bul zań jobasyn Konstitýtsiiaǵa sai dep tanyǵan.
Sonymen birge Konstitýtsiia halyq depýtatyna daýys berý nátijesi nemese Joǵarǵy rada men onyń organdarynda aitqan sózi úshin zań aldynda jaýapqa tartylmaityndyǵyna (ar-namysqa tiiý nemese jala jabýdy qospaǵanda) kepil beredi.
29 tamyzda jumysyn jańadan bastaǵan Ýkraina parlamentiniń qazirgi quramynda el prezidenti Vladimir Zelenskiidi qoldaityn "Slýga naroda" partiiasy basym daýysqa ie. Bul partiia biyl 21 shildede ótken parlamenttiń kezekten tys sailaýynda (Resei anneksiialap alǵan Qyrym men Kievke baǵynýdan bas tartqan shyǵystaǵy Donetsk jáne Lýgansk oblystarynda daýys berý ótkizilgen joq) partiialyq tizimmen de, bir mandatty okrýgterdegi sailaý qorytyndysy boiynsha da aiqyn basymdyqpen jeńiske jetken.
