3 قىركٷيەكتە ۋكراينا پارلامەنتٸ - جوعارعى رادا كونستيتۋتسيياعا حالىق دەپۋتاتتارىنىڭ تيٸسپەۋشٸلٸك قۇقىعىن شەكتەيتٸن ٶزگەرتۋلەر ەنگٸزدٸ. كەمٸندە ٷش جٷز دەپۋتاتتىڭ ماقۇلداۋىن قاجەت ەتەتٸن شەشٸمدٸ پارلامەنتتٸڭ 373 مٷشەسٸ قولداپ داۋىس بەردٸ. بۇل تۋرالى ازاتتىقتىڭ ۋكراين قىزمەتٸ حابارلادى.
جوعارعى رادا «ۋكراينا كونستيتۋتسيياسىنىڭ 80-بابىنا ٶزگەرٸستەر ەنگٸزۋ تۋرالى» زاڭدى, ياعني دەپۋتاتتاردىڭ ايىرىقشا قۇقىعىن جويۋدى ەكٸنشٸ وقىلىمدا قابىلدادى. اتالعان زاڭ 2020 جىلعى 1 قاڭتاردان كٷشٸنە ەنەدٸ.
30 تامىزدا وسى زاڭ جوباسى بٸرٸنشٸ وقىلىمدا قابىلدانعان. سەيسەنبٸدەگٸ تالقىلاۋ كەزٸندە رەگلامەنتتٸڭ بۇزىلعانىن العا تارتقان رەسەيشٸل ۇستانىمداعى "وپپوزيتسيوننايا پارتييا – زا جيزن" پارتيياسىنىڭ دەپۋتاتتارى جوباعا قارسىلىق بٸلدٸرٸپ, داۋىس بەرۋگە قاتىسۋدان باس تارتقانى تۋرالى تاسس اگەنتتٸگٸ حابارلادى.
دەپۋتاتتىڭ تيٸسپەۋشٸلٸك قۇقىعىن شەكتەۋ تۋرالى زاڭ جوباسىن وسىعان دەيٸنگٸ شاقىرىلىمداعى پارلامەنتكە سول كەزدەگٸ پرەزيدەنت پەتر پوروشەنكو ەنگٸزگەن. جوبادا كونستيتۋتسييادان جوعارعى رادانىڭ كەلٸسٸمٸنسٸز دەپۋتاتتى ۇستاۋعا, تۇتقىنداۋعا نەمەسە قىلمىستىق جاۋاپكەرشٸلٸككە تارتۋعا بولمايتىنى تۋرالى نورمانى الىپ تاستاۋ ۇسىنىلعان.
2018 جىلعى ماۋسىمدا ۋكراينا كونستيتۋتسييالىق سوتى بۇل زاڭ جوباسىن كونستيتۋتسيياعا ساي دەپ تانىعان.
سونىمەن بٸرگە كونستيتۋتسييا حالىق دەپۋتاتىنا داۋىس بەرۋ نەتيجەسٸ نەمەسە جوعارعى رادا مەن ونىڭ ورگاندارىندا ايتقان سٶزٸ ٷشٸن زاڭ الدىندا جاۋاپقا تارتىلمايتىندىعىنا (ار-نامىسقا تييۋ نەمەسە جالا جابۋدى قوسپاعاندا) كەپٸل بەرەدٸ.
29 تامىزدا جۇمىسىن جاڭادان باستاعان ۋكراينا پارلامەنتٸنٸڭ قازٸرگٸ قۇرامىندا ەل پرەزيدەنتٸ ۆلاديمير زەلەنسكييدٸ قولدايتىن "سلۋگا نارودا" پارتيياسى باسىم داۋىسقا يە. بۇل پارتييا بيىل 21 شٸلدەدە ٶتكەن پارلامەنتتٸڭ كەزەكتەن تىس سايلاۋىندا (رەسەي اننەكسييالاپ العان قىرىم مەن كيەۆكە باعىنۋدان باس تارتقان شىعىستاعى دونەتسك جەنە لۋگانسك وبلىستارىندا داۋىس بەرۋ ٶتكٸزٸلگەن جوق) پارتييالىق تٸزٸممەن دە, بٸر مانداتتى وكرۋگتەردەگٸ سايلاۋ قورىتىندىسى بويىنشا دا ايقىن باسىمدىقپەن جەڭٸسكە جەتكەن.
