Ýkraina qaýipsizdik qyzmeti Reseidiń NEYMA atty kemesin ustady. Bul tanker reseilik shekarashylar ýkrainalyq úsh kemeni ustaǵanda Kerch buǵazyn jaýyp turǵan. Bul týraly vedomstvo óziniń Facebook paraqshasynda habarlady, dep jazady Azattyq.
Qaýipsizdik qyzmetiniń jazýynsha, keme 24 shilde kúni Odessa oblysyndaǵy Izmail portyna NIKA SPIRIT degen atpen kirgen. Vedomstvo men áskeri prokýratýra "[reseilikter] tanker atyn kemeniń zańsyz áreketke ári agressiiaǵa qatysy baryn jasyrý úshin ádeii ózgertken" deidi. Ýkrainalyqtar tankerdiń shyn atyn halyqaralyq aqparattyq júie kómegimen anyqtaǵan.
Vedomstvo habaryna qaraǵanda, kemeden qujattar men jýrnaldar, radiohabar jazbalary tárkilenip, ekipaj tergelgen.
Ýkraina kemeni qamaýǵa alýǵa shaǵym daiyndap jatyr. Qaýipsizdik qyzmetiniń málimdeýinshe, Kerch buǵazyndaǵy jaǵdaiǵa qatysy bar dep joǵary shendi 15 reseilik áskeri qyzmetker kúdikke ilingen.
Resei syrtqy ister ministrligi Máskeý tankerdiń ustalýy jaily aqparatty tekserip jatqanyn aitty. Vedomstvo "Reseilikterdiń ustalyp, olardyń kepilge alynǵany ras bolsa, bul halyqaralyq quqyqty óreskel buzý bolyp sanalady. [Ýkraina] kóp kúttirmei saldaryn tartady" dedi.
2018 jyly 25 qarashada Resei anneksiialap alǵan Qyrymda reseilik shekarashylar ýkrainalyq úsh áskeri kemeni basyp alyp, 24 teńizshini ustaǵan. Teńizshilerge "Resei shekarasyn zańsyz kesip ótti" degen aiyp taǵylǵan. Bul bap boiynsha alty jylǵa deiin jaza merzimi qarastyrylǵan. Biyl 17 shildede Máskeý soty 2018 jyly qarasha aiynda Qyrym jaǵalaýynda Resei áskerileri ustaǵan ýkrain teńizshileriniń qamaý merzimin úsh aiǵa uzartty.
Kiev bul áreketti agressiia retinde baǵalap, teńizshilerdi áskeri tutqyndar dep atady. Ýkraina ustanymyn AQSh, NATO jáne Eýroodaq qoldady.
BUU-nyń Halyqaralyq tribýnaly Reseidi 25 maýsymǵa deiin ýkrainalyq teńizshilerdi bosatýǵa mindettegen. Biraq Máskeý bul sheshimdi oryndamady.
