Ýkrainanyń ministrler kabineti eldegi karantin rejimin 2021 jyldyń 28 aqpanyna deiin uzartty. Tiisti qaýly 9 jeltoqsan kúni Úkimet otyrysynda qabyldandy, dep habarlaidy Ýkrinform saity.
«El aýmaǵyndaǵy tiisti karantindik shekteýlerdi 2021 jyldyń 28 aqpanyna deiin uzartýdy usynamyz. Onymen qosa, áli de kúshin joǵaltpaǵan tótenshe jaǵdai rejimi, sondai-aq 28 aqpanǵa deiin uzartylady. Biz usynyp otyrǵan shekteýler elimizdiń búkil aýmaǵy enip otyrǵan «qyzǵylt sary aimaq» shekteýlerine sáikes keledi», - dedi Densaýlyq saqtaý ministri Maksim Stepanov.
Usynylyp otyrǵan ózgeristerge toqtalsaq: qoǵamdyq tamaqtaný oryndarynyń jumys ýaqyty 23.00-ge deiin uzartylady. Alaida, esep aiyrysý operatsiialary 22.00-de toqtatylady.
Qańtar aiynyń sońy men aqpan aiynyń basynda tumaýmen jáne JRVI-men syrqattaný dástúrli túrde artatyny eskerile otyryp, 8 qańtar saǵat 00.00-den bastap, 25 qańtar saǵat 00.00-ge deiin qatań karantindik shekteýler engizý usynylǵan.
Jańa jyl túninde tamaqtaný oryndaryna túngi saǵat 01.00-ge deiin ǵana jumys isteýge ruqsat berilmek.
Qalaaralyq jáne halyqaralyq jolaýshylar qatynasyn toqtatý josparlanyp otyrǵan joq.
9 jeltoqsandaǵy jaǵdai boiynsha, Ýkrainada koronavirýs infektsiiasynyń 845 343 oqiǵasy zerthanalyq túrde rastalǵan. Sonyń ishinde 12 585-i sońǵy táýlikte ǵana anyqtalǵan.
