18 shildege qaraǵan túni Ýkraina Reseidiń birneshe óńirine aýqymdy dron shabýylyn jasady. Negizgi nysanalardyń qatarynda Reseidegi eń iri marketpleisterdiń biri – Wildberries kompaniiasynyń Máskeý oblysy men Tambov oblysyndaǵy logistikalyq ortalyqtary boldy, dep habarlaidy ult.kz.
Tambov oblysyndaǵy Kotovsk qalasynda ornalasqan qoimaǵa jasalǵan shabýyl saldarynan túngi aýysymda jumys istep jatqan 7 qyzmetker qaza tapty, taǵy 25 adam jaraqat aldy. Olardyń kópshiligi aýrýhanaǵa jetkizilip, birneshe adamnyń jaǵdaiy aýyr ekeni habarlandy.
Máskeý oblysyndaǵy Elektrostal qalasyndaǵy Wildberries qoimasy da shabýylǵa ushyrady. Sonymen qatar Noginsk qalasyndaǵy munai bazasyna da drondar soqqy bergen. Sońǵy málimet boiynsha, Máskeý oblysynda 61 adam zardap shekken, olardyń birqatary aýyr halde.
Shabýyldan keiin qoimalarda iri órt shyǵyp, qoiý qara tútin ondaǵan shaqyrym jerden kóringeni aityldy.
Wildberries ne deidi?
Kompaniianyń basshysy Tatiana Kim bul oqiǵany «kompaniia men el úshin aýyr tún» dep baǵalap, qaza tapqandardyń otbasylaryna kóńil aitty.
Kompaniia:
- qaza tapqan qyzmetkerlerdiń otbasyna 2 million rýblden;
- aýyr jaralanǵandarǵa 1 million rýblden ótemaqy tóleýge ýáde berdi.
Sonymen qatar kompaniia qoimalarda joiylǵan taýarlar úshin satýshylarǵa ótemaqy tóleý máselesin qarastyryp jatqanyn málimdedi. Buǵan deiin Wildberries kelisimshartyna dron shabýyldary kezinde kompaniianyń jaýapkershiligin shekteitin tarmaq engizilgen bolatyn.
Resei ne málimdedi?
Resei Qorǵanys ministrliginiń málimetinshe, bir tún ishinde áýe qorǵanys kúshteri 379 ýkrainalyq drondy atyp túsirgen. Olar Reseidiń 19 óńiri, anneksiialanǵan Qyrym, sondai-aq Azov jáne Qara teńizderi ústinde joiylǵany habarlandy.
Bul aqparattar soǵys jaǵdaiynda taraptardyń resmi málimdemelerine negizdelgen. Urys aimaqtaryndaǵy oqiǵalar týraly derekterdi táýelsiz túrde tolyq rastaý árdaiym múmkin bola bermeidi.
