Ýkrainada reseishil separatisterdiń baqylaýyndaǵy Lýganskide 13 shildege qaraǵan túni jarylys úni estilip, órt bolǵan. Reseidiń memlekettik aqparat quraldary jáne separatister ýkrain áskeriniń qaladaǵy nysandarǵa zymyranmen soqqy jasaǵanyn habarlady. Al Ýkraina qarýly kúshteri ázirge eshqandai habarlama taratpady, dep jazady Azattyq.
Lýgansk soǵys liniiasynan 70 shaqyrymnan astam jerde ornalasqan. Resei aqparat quraldarynyń jazýynsha, qalaǵa amerikalyq HIMARS dúrkindete atatyn reaktivti qarýynan soqqy jasalǵan. "Tochka-Ý" zymyrany týraly da aityldy. Separatister ókiliniń málimetinshe, Lýganskidegi áýe shabýylynan qorǵaityn júie shoǵyrlanǵan áskeri bólimder zymyranmen atqylanǵan. Zymyrandardyń bir bóligine toitarys berilgen. Separatisterdiń burynǵy qolbasshysy Igor Strelkov bazanyń joiylǵanyn habarlady.
Lýganskide soqqynyń jalǵasyp jatqanyna eki kún boldy. Internette jarylys týraly túrli videolar tarady. Qaza bolǵandar jaily ázirge málimet joq.
Keiingi aptalarda ýkrain áskeri Resei kúshteriniń nysandaryna burynǵydan góri tegeýrindi soqqy jasai bastaǵan. Olar áskeri nysandar men oq-dári qoimalaryna shabýyldaǵan. Dúisenbi kúni Herson oblysyndaǵy Novaia Kahovka aýdanyna soqqy jasaldy. Reseige qaraityn jergilikti ákimshiliktiń málimdeýinshe, jeti adam qaza bolǵan, kóp ǵimarat qiraǵan. Ýkraina áskeri naqty soqqylar jóninde málimet bermedi, alaida soqqy jasalǵanyn moiyndaidy. Ýkraina BAQ-taryndaǵy derekkózder men kóp bloger joǵary laýazymdy orys áskerileriniń qaza bolǵanyn habarlady.
Aqparatqa qaraǵanda, Resei áskeri sársenbige qaraǵan túni Donetsk oblysyndaǵy Kramatorsk, Konstantinovka jáne Dnepropetrovsk oblysynyń ońtústigindegi Nikopoliaǵa zymyran jibergen. Resei kúshteri Harkovti de atqylap jatyr. Qaza tapqandar men zardap shekkender bar.
Britan áskeri barlaý qyzmetiniń habarlaýynsha, aldaǵy aptada Resei Donetsk oblysyndaǵy Slaviansk jáne Kramatorskige qarai jyljymaq.
