Juma, 11 qarashada ýkrain armiiasy orys áskeri shyǵyp ketken oblys ortalyǵy Herson qalasyna kirdi. Resmi túrde qalanyń azat etilgeni habarlanǵan joq. Alaida áleýmettik jelide jariialanǵan sýretter men videolardan qala kóshelerinde ýkrain áskeriniń júrgeni kórinedi, dep habarlaidy Azattyq.
Hersonnyń júzdegen turǵyny ýkrain áskerin qarsy alý úshin eldiń jalaýyn ustap, kóshege shyqty. Ortalyq alańda da Ýkraina týy kóterildi.
Qalada qandai da bir shaiqastyń júrip jatqany jóninde aqparat joq. Resei qorǵanys ministrligi osyǵan deiin orys áskeri Herson ornalasqan Dneprdiń oń jaǵalaýynan shyǵaryldy dep málimdegen.
Resei áskeriniń sheginetini jóninde general Sergei Sýrovikin sársenbi, 9 qarashada habarlaǵan. Osylaisha, áskerdi áketýge eki táýlikke jýyq ýaqyt ketken. Shegingen Resei áskeri Dnepr arqyly ótetin kópirdi jaryp ketken.
Buǵan qosa, ýkrain áskeriniń Herson oblysynda Dneprdiń oń jaǵalaýyndaǵy ózge eldi mekenderdi soǵyssyz alyp jatqany da habarlandy. Arasynda Chernobaevka da bar. Jergilikti turǵyndar "Resei munda máńgilik" degen jazýy bar plakattardy julyp jatyr.
Resei áskeri Herson qalasy men oblysynyń basym bóligin soǵystyń alǵashqy kúnderi basyp alǵan. Qyrkúiekte oblysty Reseige qosý týraly psevdoreferendým ótti. BUU elderiniń basym bóligi jáne Ýkraina referendým men anneksiiany moiyndaǵan joq. Budan soń ýkrain áskeri oblystyń soltústiginde kontrshabýylǵa kóshti.
Keiin Resei áskerin Hersonnan áketti. Sheginerdiń aldynda qaladan sovettik eskertkishter, kniaz Grigorii Potemkinniń kúli, birqatar mýzei eksponattary áketilgen. Orys soldattary keter kezde telemunarany jaryp ketken. Kremldiń baspasóz hatshysy Dmitrii Peskov juma kúni "Resei Herson oblysyn áli óz aýmaǵy dep esepteidi" dep málimdedi.
