Foto: Aqorda
Memleket basshysy Ulttyq qaýipsizdik komitetiniń tóraǵasy Ermek Saǵymbaevty qabyldady. Bul týraly Aqordanyń baspasóz qyzmeti málim etti.
Qasym-Jomart Toqaevqa vedomstvonyń jyl basynan beri atqarǵan jumysynyń negizgi qorytyndylary jáne aldaǵy kezeńge arnalǵan mindetteri týraly esep berildi.
Ermek Saǵymbaev ulttyq qaýipsizdik organdary 4 terroristik aktiniń aldyn alǵanyn habarlady. UQK málimetinshe, terrorizm men ekstremizmge qatysy bar 84 adam sottalǵan, 44 adam ustalǵan. Lańkestik sipattaǵy qylmys jasady degen kúdikpen izdeýde júrgen qazaqstandyq 6 azamat Siriia men Túrkiiadan ekstraditsiialandy, olardyń ekeýi sottaldy. Terrorizm men ekstremizmge qatysy bar 824 sheteldiktiń Qazaqstanǵa kirýine jol berilmedi.
Budan bólek, Qasym-Jomart Toqaevqa Ishki ister ministrligimen birge 19 uiymdasqan qylmystyq toptyń áshkerelengeni, 60 adamnyń qamaýǵa alynǵany baiandaldy. Zańsyz ainalymdaǵy 505 atys qarýy, 5 qoldan jasalǵan jarylǵysh qurylǵy, 45 jarylǵysh toptama jáne 15 046 oq-dári tárkilendi. Esirtki óndiretin 33 zerthana, ony tasymaldaityn 35 halyqaralyq jáne 31 óńirlik arna joiyldy. Sondai-aq 3,2 tonna esirtki quraldary jáne psihotroptyq zattar, 4,5 tonna kóknár shikizaty, 18,8 tonna prekýrsorlar tárkilendi. Esirtki quraldary men psihotroptyq zattardyń zańsyz ainalymyna qatysy bar 162 adam sottaldy.
UQK tóraǵasynyń aitýynsha, ekonomikalyq qaýipsizdikti qamtamasyz etý jáne sybailas jemqorlyqqa qarsy is-qimyl aiasynda 1,6 trillion teńgeden astam kólemde memleketke keltiriletin zalalǵa tosqaýyl qoiyldy, biýdjetke 315 milliard teńge óteldi. Sybailas jemqorlyq áreket jasaǵany úshin 46 adam sottaldy.
Memlekettik shekarada 55 myńǵa jýyq quqyq buzýshy ustaldy, qarý men oq-dárini, esirtki men basqa da tyiym salynǵan zattardy tasymaldaýdyń 1300-den asa áreketiniń joly kesildi. Shekara arqyly 18 milliard teńge kóleminde valiýta men quny 66 milliard teńge bolatyn taýarlardy zańsyz ótkizýge jol berilmedi.
Zańsyz kóshi-qonnyń 20 arnasy toqtatyldy. Komitet memlekettik organdardyń aqparattyq júielerine 552 millionnan astam kibershabýyldy jáne 6 myń DDoS-shabýyldy toitardy.
Prezident kezdesý sońynda ulttyq qaýipsizdik organdary qyzmetiniń baǵyttary boiynsha birqatar tapsyrma berdi.
