© Sputnik / Timýr Batyrshin
Qańtar oqiǵasy boiynsha Ulttyq qaýipsizdik komitetiniń tórt departamentiniń burynǵy basshylary jaýapqa tartylyp jatyr. Bul týraly UQK tóraǵasynyń orynbasary Asqar Ámirhanov málimdedi, dep habarlaidy Sputnik Qazaqstan.
Májilis kýlýarynda jýrnalister qańtar oqiǵasy boiynsha UQK-nyń qansha qyzmetkeri jaýapqa tartylyp jatqanyn surady.
"UQK burynǵy tóraǵasy, onyń orynbasarlary jáne oblystyq departamentterdi basqarǵan birneshe qyzmetker, iaǵni taǵy tórt departament basshysy. Olar Qyzylorda, Almaty oblystary jáne Almaty qalasynyń departament basshylary jáne besinshi departamenttiń burynǵy basshysy. Barlyǵy jeti adam jaýapqa tartylyp jatyr", - dedi Ámirhanov.
Tórt departament basshysyna qatysty qandai baptar boiynsha is qozǵaldy degen suraqqa: "Sol baptar boiynsha jáne áreketsizdigi men salǵyrttyǵy úshin", dep naqtylady Ámirhanov.
Eske salsaq, Ulttyq qaýipsizdik komitetiniń burynǵy basshysy Kárim Másimov jappai tártipsizdikterden keiin 6 qańtarda qyzmetinen bosatyldy. 8 qańtarda onyń ustalǵany belgili boldy. Sondai-aq onyń eki orynbasary – Ánýar Sadyqulov ("A" arnaiy maqsattaǵy qyzmetiniń bastyǵy) men Dáýlet Erǵojin ustaldy. Artynan Másimovtyń taǵy bir orynbasary Marat Ósipov qamaýǵa alyndy.
Kúdiktilerge memleketke opasyzdyq jasaý jáne bilikti kúshpen basyp alýǵa nemese Qazaqstannyń konstitýtsiialyq qurylysyn kúshtep ózgertýge baǵyttalǵan áreketterden basqa, "bilikti nemese qyzmettik ókilettikterdi asyra paidalaný" baby boiynsha aiyp taǵylyp otyr.
