Foto ©REUTERS
Quqyq qorǵaý organdarynyń jekelegen basshylaryna qatysty da arnaiy prokýrorlar tergeý amaldaryn júrgizip jatyr. Bul týraly Bas prokýratýranyń birinshi qyzmeti basshysynyń orynbasary Eldos Qilymjanov málimdedi, - dep habarlaidy Tengrinews.kz.
Qilymjanov 5 qańtarda Almaty, Almaty oblysy, Jambyl jáne Qyzylorda oblystaryndaǵy eki politsiia departamenti men UQK-niń úsh departamentiniń basshylary óz ǵimarattaryn qarýmen qaldyrǵanyn eske saldy.
"Olardyń barlyǵy kúdikti dep tanyldy. Bul fakt boiynsha qyzmettegi áreketsizdik babymen toǵyz qylmystyq is qozǵaldy", - dedi Bas prokýratýranyń 1-qyzmeti basshysynyń orynbasary.
Sondai-aq ol 1 jáne 2 sáýirde Jambyl oblysy IID bastyǵynyń eks-orynbasary men Almaty áýejaiyndaǵy jelilik politsiia bóliminiń bastyǵy ustalyp, ýaqytsha ustaý izoliatoryna qamalǵanyn atap ótti.
Qilymjanovtyń aitýynsha, tergeý áreketterin júrgizý barysynda zańnyń ústemdigi men azamattardyń quqyqtaryn saqtaýdy qamtamasyz etýge erekshe kóńil bólinedi.
"Ruqsat etilmegen tergeý ádisterin qoldanýdyń barlyq derekteri boiynsha sotqa deiingi tergeý júrgizilip jatyr. Arnaiy prokýrorlar eń atyshýly on isti tergeýde. Osy ister aiasynda 9 laýazymdy tulǵa, onyń ishinde 8 UQK qyzmetkeri jáne bir politsiia qyzmetkeri ustaldy", - dedi ol.
Sondai-aq, ol dál qazir qamaýda otyrǵan kúdiktilerdiń eshbirine tergeýdiń ruqsat etilmegen tásilderi qoldanylyp jatpaǵanyn resmi málimdedi.
«Áleýmettik jelide qamaýda otyrǵandarǵa qatysty tergeýdiń ruqsat etilmegen ádisterin qoldaný jalǵasyp jatqany týraly jazbalar jariialanyp jatyr. Atalǵan adamdarǵa qatysty eshqandai zorlyq-zombylyq qoldanylyp jatpaǵanyn sendirip aitamyz. Bul rette biz buryn qoldanylǵan bultartpaý sharalaryn jeńildetý jónindegi jumystardy jalǵastyryp jatyrmyz. Prokýrorlar ustalǵan jáne kúdikti adamdardyń týystarymen kezdesý ótkizedi. Olardyń dálelderin muqiiat teksere jáne osyny eskere otyryp, bultartpaý sharalaryn ózgertý týraly sheshim qabyldaidy. Jeke basyn, densaýlyq jaǵdaiyn jáne basqa da sipattardy eskere otyryp, 275 adamnyń qamaýda ustaý túrindegi bultartpaý sharasy eshqaida ketpeý týraly qolhatqa, kepilge, úiqamaqqa alýǵa jáne jekekepilgerlikke aýystyryldy» - deidi Qilymjanov.
