Ulttyq qaýipsizdik komiteti «Aishýaq-Jantúgel» uiymdasqan qylmystyq tobynyń 7 múshesi qolǵa túsken sátti videosyn jariialady, dep habarlaidy "Ult aqparat".
«Jedel qyzmetterdiń málimeti boiynsha, Qazaqstanda aýyr jáne asa aýyr qylmystan taiynbaityn 40-tan astam top bar. Olardyń ieliginde kóptegen qarý-jaraq pen iri adam kapitaly bar, qarjylyq turǵyda táýelciz», - delingen kadr syrtyndaǵy málimette.
Quqyq qorǵaý organdary 2020 jyldyń ózinde ǵana 10 qylmystyq topty joiyp, 40-tan astam top serkeleri men múshelerin ustaǵan eken. Solardyń arasynda «Aishýaq-Jantúgel» degen atpen belgili uiymdasqan qylmystyq toptyń 7 belsendi múshesi de bar. Kúdiktiler qaýipsizdik qyzmetiniń qolyna 2020 jyldyń qarashasynda túsken bolatyn.
«Tergep-tekserý kezinde qylmystyq toptyń yqpaly 2018 jyly Sarybulaq kólinde zańsyz balyq aýlaý kásibine baqylaý ornatqan kezden bastap, keńeie túskeni belgili boldy. Qolǵa túsken top músheleri Almaty bazarlary men «Sairan» avtobeketin jáne basqa da nysandardy «baqylaýda» ustaǵandary anyqtaldy. «Alataý», «Ójet», «Kenjehan» bazarlarynyń kásipkerlerine «qamqorlyq» kórsetip, atalǵan bazarlar men «Baraholkanyń» avtoturaqtaryn da baqylaýda ustaǵan. Top músheleri qatysqan adam urlaý jáne basqa qylmystarmen bailanysty qylmystyq epizodtar áshkerelendi», - deidi UQK mamandary.
Ustalǵandardyń ústinen kisi óltirý, qaraqshylyq shabýyl, bopsalaý jáne ozbyrlyq faktileri boiynsha 17 qylmystyq is qozǵaldy. Oǵan Ulttyq qaýipsizdik komiteti men Ishki ister ministrliginiń ókilderi jinaǵan derekter negiz bolǵan.
«Toptyń jekelegen músheleriniń 2016 jyly qylmys áleminiń bedeldi ókili bolǵan Nurbekovtiń ólimine qatysy týraly málimetter jinaldy. Qazirgi tańda atalǵan toptyń qalǵan múshelerin anyqtaý jáne ustaý boiynsha jumystar júrip jatyr», - delingen UQK málimetinde.
