Foto: QR UQK baspasóz qyzmeti
Qazaqstannyń segiz óńirinde birmezgilde arnaiy operatsiia júrgizilip, atys qarýyn satýdyń iri arnasy joiyldy, - dep habarlaidy "Ult aqparat" QR UQK baspasóz qyzmetine silteme jasap.
"29 naýryzda UQK Qazaqstan Respýblikasy IIM-men birlesip, eki vedomstvonyń arnaiy maqsattaǵy bólimshelerin tarta otyryp, iri aýqymda zańsyz qarý ainalymymen ainalysqan qylmystyq top áreketiniń jolyn kesti.
Qylmystyq shemanyń qatysýshylary oqsyz atylatyn, jaraqattaityn, belgi beretin jáne ózge de ólimge alyp kelmeitin qarýdy keiinnen "qara naryqta" ótkizý úshin jaýyngerlikke qaita jasaýmen ainalysqan.
Arnaiy operatsiia Astana, Almaty qalalarynda jáne Aqtóbe, Almaty, Batys Qazaqstan, Qaraǵandy, Soltústik Qazaqstan jáne Túrkistan oblystarynda bir mezgilde júrgizildi", - delingen vedomstvo habarlamasynda.
Nátijesinde qylmystyq shemaǵa qatysy bar degen kúdikpen 23 adam ustalǵan.
"32 avtomat, 88 tapansha, 37 myltyq (barlyǵy 157 birlik qarý), 9 granata jáne ártúrli kalibrli 27390 oq-dári alyndy. Qarý men oq-dáriler jasaýǵa arnalǵan arnaiy jabdyqtary men jinaqtary bar qoldan jasalǵan 7 tsehtyń jasyryn áreketi joiyldy.
Ustaý aldynda uzaq ýaqyt jete tekserý júrgizilip, onyń barysynda ártúrli kalibrli urys patrondary men oq-dárilerge keltirilip qoldan jasalǵan "Kalashnikov" avtomatyn, úsh tapanshany jedel satyp alý júzege asyryldy", - delingen habarlamada.
2023 jyldyń aqpanynda UQK Aqtóbe oblysynda uiymdastyrýshylary osy qylmystyq toppen bailanysy bar qarýdy qoldan jasaýmen ainalysqan sheberhananyń jumysyn toqtatqanyn aita ketý kerek.
"Jedel jolmen qylmystyq shemanyń barlyq tizbegi ashyldy.
Qarýdy ótkizý tásilderi, sonyń ishinde "Darkshop" dep atalatyn Internettiń kóleńkeli segmentindegi saýda alańdary anyqtaldy.
Top músheleri qupiialylyq pen qaýipsizdiktiń qatań sharalaryn saqtaǵan, árqaisynyń róli muqiiat bólinip berilgen (jasaýshylar, satýshylar, deldaldar jáne t.b.)", - delingen UQK málimetinde.
Sotaldy tergeý júrgizilip jatyr. Zańsyz qarý satý jáne satyp alýǵa qatysy bar basqa da adamdardy anyqtaý boiynsha jumys jalǵasyp jatyr.
