Ulttyq qaýipsizdik komiteti eldiń batysynda esirtki ósirgen qylmystyq topty quryqtady.
Vedomstvonyń baspasóz qyzmetiniń aqparatynsha, Ulttyq qaýipsizdik komiteti ishki ister ministrliginiń arnaiy maqsattaǵy kúshterin tarta otyryp, Atyraý jáne Batys Qazaqstan oblystarynyń aýmaǵynda quramynda esirtki bar ósimdikter ósirýdi uiymdastyrǵan qylmystyq toptyń jolyn kesti.
Arnaiy operatsiia kezinde úsh plantatsiiada 31 adam ustaldy. Onyń 17-si sheteldik, sondai-aq esirtki tobyn uiymdastyrýshy da qolǵa tústi.
Zańsyz ainalymnan 4 tonnadan astam marihýana, 7 atys qarýy men oq-dári tárkilendi. Tintý barysynda brakonerlik jolmen alynǵan aqbóken múiizderi men bekire tuqymdas balyqtar tabyldy.
Vedomstvo figýranttardyń esirtki qylmysyna qatysyn rastaityn bultartpas aiǵaqtarǵa qol jetkizilgenin atap ótti.
