Qazaqstan Prezidenti Nursultan Nazarbaev óziniń ómirlik jolynda kásiptik-tehnikalyq oqý ornynda alǵan «bolat qorytýshy» mamandyǵy ózin qalai alǵa jetelegenin aityp berdi, dep habarlaidy QazAqparat tilshisi.
«Bir adamnyń qandai da bir kúrdeli jaiǵa dýshar bolyp, múgedek bolýy - úlken qaiǵy. Alaida osy qasiretke boi bermei, adam eńsesin tiktep, on ret qulasa da, alǵa umtylatyn adamdar - bizdiń búgingi batyrlarymyz. Olar ornynan turý bylai tursyn, ózi qatarly adamdardy da oqytyp jatyr. Bizde Qazaqstanda bárine jumys tabylady. Men árdaiym osyny aityp otyramyn. Kez kelgen jerde vakansiia bolǵandyqtan, Qazaqstanda jumyssyzdar bolmaýy kerek. Másele - keibir adamdarda mamandyqtarynyń bolmaýynda. Mamandyǵy bar adamdarda jumyssyz qalý qaýpi joq. Astanada máselen qurylysshylar, dánekerleýshiler jetispeidi. Sondyqtan men jastarǵa birinshi kezekti jumysshy mamandyǵy tegin berilýi kerek ideia kóterip, Úkimet ony júzege asyryp jatyr», - dedi Memleket basshysy elordada ótip jatqan VIII Azamattyq forýmda.
Nursultan Nazarbaev jastardyń bir bóligi qazirgi tańda ýniversitet, kolledjderge baryp jatsa da, keibiri eshqaida ornyn tappai qalatyryn tilge tiek etti.
«Mine, osy jastardy kásiptik bilim beretin oqý oryndarynda memlekettiń esebinen oqý oqyp alýǵa shaqyramyz. Budan artyq jastarǵa ne usynýǵa bolady. Iaǵni, Úkimettik emes uiymdar jergilikti oryndarda jumyssyz júrgen jastardy suranysy bar 17 oblysqa jiberetin bolsa, másele sheshiledi. Men de ómir jolyn osylai bastaǵanmyn. Ondailar kóp. Kásiptik-tehnikalyq oqý ornynda alǵan «bolat qorytýshy» mamandyǵy meni alǵa jeteledi. Men soǵystan keiin kedeishilikte ómir súrgen aýyl balasymyn. Kierge kiimimiz joq edi. 15 jasqa deiin toiyp tamaq ishken kezim esimde joq. Bálkim, osydan keiin denemiz iri bolǵan da shyǵar», - dep sózin ázilmen aiaqtady Nursultan Nazarbaev.
Memleket basshysy bala kezdegi osy ortadan keiin aýyr jumysqa túskenin eske aldy.
«Peshtiń janynda kúrek ustap jumys istedik. Aldyń - 1500 gradýstyq metall, artyń - 40 gradýs sýyqta eńbek ettik. Osynyń bárine shydaý kerek boldy. Sondyqtan, jastar eńbekke den qoiýy tiis. Mynaý álem ádilettilikke toly dep senbeý kerek. Ádiletsizdikti eńserý kerek. Bálkim, Kennedi me eken bir kisiniń: «Úkimet maǵan qalai kómektesti dep emes, men Úkimetke qalai kómektestim» degenindei oi júrýi kerek. Úkimetti biz ózimizdiń nemerelerimiz ben shóberelerimiz úshin quryp jatyrmyz. Sol sebepti, Úkimettik emes uiymdar patriot bolýy kerek», - dedi Prezident.
