Búgin Ońtústik Qazaqstan oblysynyń ákimi Janseiit Túimebaev óńirdegi qoǵamdyq uiymdardyń ókilderimen kezdesti, dep habarlaidy "Ult aqparat".
Jiynǵa oblys, aýdan, qala ákimderiniń orynbasarlary, oblystyq basqarma, biznes-qurylym jáne kommertsiialyq uiymdar basshylary, aýdan, qalalardaǵy úkimettik emes uiym basshylary men oblystyq qoǵamdyq keńes músheleri qatysty.
Ońtústik Qazaqstan oblysy ákiminiń orynbasary Ulasbek Sádibekov oblystaǵy qoǵamdyq birlestikterdiń qyzmeti týraly baiandama jasady.
Onyń aitýynsha, qazirgi tańda óńirimizde 1268 qoǵamdyq uiym tirkelgen. Onyń 558-i úkimettik emes uiym bolsa, 174-i belsendi úkimettik emes uiym sanalady. Oblysta úkimettik emes uiymdar qoldaý maqsatynda jyl saiyn qarjylandyrý kólemi artyp keledi. Nátijesinde óńirimizde 200-ge jýyq joba júzege asyrylýda.
«Alaida keibir salalar boiynsha júieli jumys jetkiliksiz. Atap aitar bolsam, din salasyndaǵy túsindirý jáne nasihat, memlekettik jastar saiasaty, sýitsid máselesi, kámeletke tolmaǵan jasóspirimder arasyndaǵy erte júktilik, etnosaralyq yntymaq, bilim salasyndaǵy jemqorlyq, turǵyndardyń quqyqtyq saýattylyǵyn arttyrý máselelerinde úkimettik emes uiymdardyń belsendiligi áli de bolsa tómen» - dedi Ulasbek Sádibekov.
Májiliste sóz alǵan «OQO Azamattyq Aliansy» zańdy tulǵalardyń qaýymdastyq nysanyndaǵy birlestiginiń tóraǵasy Sháripbek Jamalbek memlekettik áleýmettik tapsyrys sheńberinde uzaq merzimdi 3 jyldyq konkýrs ótkizý máselesin kóterdi. Al, Shymkent qalasyndaǵy múgedekter qoǵamdyq birlestiginiń tóraǵasy Vadim Toropov Ordabasy, Sairam, Báidibek, Túlkibas, Shardara aýdandarynda «Inva Taksi» qyzmetin uiymdastyrý jóninde usynysyn jetkizdi.
Munan soń minberge "Sozaq jastary" qoǵamdyq birlestiginiń tóraǵasy Birjan Sarjanov, «QR jergilikti soǵys jáne Aýǵanstan ardagerler odaǵy» OQO boiynsha qoǵamdyq birlestiginiń tóraǵasy Ǵalymjan Maihanov, «Balalardy SPID-ten qorǵaý ortalyǵy» qoǵamdyq birlestiginiń tóraiymy Janneta Jazyqbaeva, «Dos-Demeý» qoǵamdyq birlestiginiń tóraǵasy Janysbek Ótegenovter baiandama jasap, birqatar utymdy usynystaryn jetkizdi.
Jiyndy qorytqan oblys ákimi óńirimizdegi úkimettik emes sektordyń belsendiligin arttyrý maqsatynda biznes qurylymdarmen tyǵyz qarym-qatynas ornatyp, yntymaqtastyqta jumys atqarýǵa shaqyrdy.
«Azamattyq qoǵam institýttary - bilik pen buqaranyń arasyndaǵy kópir ispetti. Jalpy, qandai da bir iste bolmasyn, ózara birlik pen yntymaqtyń arqasynda, túsinistiktiń nátijesinde júzege asyrýymyz qajet. Osy rette sizderge tek úkimet qarjysyna ǵana qarap otyrmai, biznes qurylymdarmen birlese, yntymaqtasa jumys isteýge shaqyramyn, iaǵni úkimettik emes uiymdar áleýmettik kásipkerlikti arttyrýǵa kúsh salýy tiis. Sonda ǵana qoǵamnyń ómirsheń problemalaryn túpkilikti sheshýge qol jetkizetin bolamyz», - dedi Janseiit Qanseiituly.
Jiyn sońynda óńir basshysy oblystaǵy belsendi úkimettik emes uiym ókilderin alǵys hatpen marapattady.
