Halyqty vaktsina alýǵa yntalandyrý úshin túsindirý jumystaryn ary qarai júrgizý qajet. Bul týraly búgin Úkimet otyrysynda QR Premer-Ministriniń orynbasary Eraly Toǵjanov aitty, dep habarlaidy "Ult aqparat".
«Epidemiologiialyq jaǵdai kúndelikti baqylaýda. Qoldanylǵan is-sharalar epidemiologiialyq ahýaldyń turaqtylyǵyn qamtamasyz etýde. Mamyrdyń 2-15-i aralyǵynda KVI juqtyrǵandardyń sany aldyńǵy kezeńmen salystyrǵanda 5 893 adamǵa tómendegen. Sonymen qatar birneshe kúnde «qyzyl» aimaqtaǵy óńirlerdiń sany azaiyp, 6 óńirge qysqardy. Bul qabyldanǵan naqty is-sharalardyń júzege asyp jatqanyn kórsetedi», - dedi Eraly Toǵjanov.
Degenmen, Úkimet basshysynyń orynbasary ortalyq jáne jergilikti memlekettik organdarǵa birqatar baǵyt boiynsha naqty is-sharalar qabyldaý qajettigin basa aitty.
«Birinshiden, halyqty vaktsina alýǵa yntalandyrý úshin túsindirý jumystaryn ary qarai arttyrýymyz kerek. Sondyqtan Densaýlyq sataý ministrligi, ákimdikter mundai jaǵdaida kópshilikke kásibi turǵydan jáne jedel túsindirý jumystaryn jolǵa qoiýy tiis. Ekinshiden, «Ashyq» júiesi azamattar arasynda shekteý is-sharalaryn óreskel buzýshylardyń artyp otyrǵandyǵyn kórsetti. Sol sebepti bul baǵytta Densaýlyq saqtaý ministrligi Ádilet ministrligimen jáne Bas prokýratýramen birge sanitarlyq rejimdi buzýshylarǵa qatysty tiisti ákimshilik sharalardy qoldaný tetigin pysyqtaýy qajet. Osyndai is-sharalardy qolǵa alsaq degen niet bar», - dedi Premer-Ministrdiń orynbasary.
