Jambyl oblysynyń ákimi Berdibek Saparbaev Úkimet basshysynan Qyrǵyzstan Úkimetimen transshekaralyq ózender máselesin talqylaýdy surady, dep habarlaidy QazAqparat tilshisi.
«Ózderińiz jaqsy bilesizder, biyl bizde taǵy da qýańshylyq bolaiyn dep tur. Soǵan bailanysty bar sýdy únemdeýimiz kerek. Ol úshin jańa tehnologiialardy, tamshylatyp sýǵarý júiesin engizý kerek. Byltyrdan beri jerasty sýyn paidalanýdy qolǵa alyp jatyrmyz. Jalpy bizdiń óńirde 700-jýyq uńǵyma bar. Sonyń 70-ke jýyǵyn biyl iske qosamyz», - degen Berdibek Saparbaev Premer-Ministr Álihan Smaiylovtan kómek surady.
«Sýǵa bailanysty biz ministrlikpen jumys istep jatyrmyz. Osy jerde sizdiń kómegińiz kerek. Kórshi memleketten Shý, Talas ózenderi arqyly Kirov jáne Orta Toqai sý qoimalarynan alynatyn sýdyń kólemin 550, 470 mln tekshe metr bolýy kerek. Ózińizdiń áriptesińizben sóilesip, kelisimshartqa sáikes sý alsaq jaqsy bolar edi», - dedi ol Úkimet otyrysynda.
Sondai-aq ol aýyl sharýashylyǵy sýbsidiialaryn jergilikti biýdjet esebeninen tóletý bastamasy týraly pikir bildirdi.
«Taǵy bir ótinish sýbsidiiaǵa bailanysty. Aýyl sharýashylyǵy ministrligimen jumys istep jatyrmyz. Siz (QR Úkimet basshysy Álihan Smaiylov - avt. ) tapsyrma berseńiz, osy aida tezirek berile bastasa. Ministrlikte sýbsidiiany tolyq jergilikti biýdjetke beremiz degen áńgime júrip jatyr. Jergilikti biýdjettiń jaǵdaiy qalai ekenin ózińiz jaqsy bilesiz. Sondyqtan jergilikti biliktermen birge taǵy da pysyqtasa...», -dedi Jambyl oblysynyń ákimi Úkimet basshysyna qarata aitqan sózinde.
