QR Premer-Ministri Asqar Maminniń tóraǵalyǵymen ótken Úkimet otyrysynda jeke tulǵalardy jalpyǵa ortaq deklaratsiialaýdy engizý barysy qaraldy, dep habarlaidy "Ult aqparat" primeminister.kz saityna silteme jasap.
Qarjy ministri Erulan Jamaýbaev jáne Premer-Ministrdiń birinshi orynbasary Álihan Smaiylov baiandama jasady.
Jalpyǵa ortaq deklaratsiialaýdy engizý 100 naqty qadam – Ult josparynyń 42-qadamynda qarastyrylǵan. Bul shara jeke tulǵalar kiristeriniń ashyqtyǵyn qamtamasyz etýge múmkindik beredi. 2021 jylǵy 1 qańtardan bastap memlekettik qyzmetshiler jáne olarǵa teńestirilgen adamdar úshin jalpyǵa ortaq deklaratsiialaýdy engizýdiń birinshi kezeńi bastaldy. 2023 jyldan bastap memlekettik mekemeler men kvazimemlekettik sektordyń qyzmetkerleri men olardyń jubailary deklaratsiia tapsyra bastaidy. 2024 jyldan bastap zańdy tulǵalardyń basshylary men quryltaishylary, sondai-aq jeke kásipkerler men olardyń jubailary, al 2025 jyldan bastap azamattardyń barlyq qalǵan sanattary tapsyra bastaidy. Qazaqstanda deklaratsiialardy qabyldaý boiynsha elektrondyq servister jumys isteidi: salyq tóleýshiniń kabineti (cabinet.salyk.kz), «Elektrondyq úkimettiń» veb-portaly jáne «E-Salyq Azamat» arnaiy mobildi qosymshasy. Jyl saiyn elektrondyq bazalar jetildirilýde, sondyqtan azamattarǵa Qazaqstannyń memlekettik organdary men bankterinde tirkelgen múlki men aktivteri týraly málimetter usynýdyń qajeti joq.
«Bastalǵan jumysty bekitilgen merzimderge sáikes oryndap, jalpyǵa ortaq deklaratsiialaýdy engizý boiynsha halyqqa túsindirý jáne oqytý jumystaryn júrgizý qajet», — dedi Mamin.
